«Уһук Илиҥҥэ 1000 тиэргэн» бырайыак Хаҥалас улууһар тиһиктээхтик салҕанар

Саха сиригэр 2022 сылтан дьон олоҕун хаачыстыбатын уонна таһымын үрдэтиигэ туһуламмыт «Уһук Илиҥҥэ 1000 тиэргэн» бырагыраама ситиһиилээхтик үлэлиир. Санатан эттэххэ, «Уһук Илиҥҥэ тиэргэннэри тупсаҕай оҥоруу» бырагыраама 2021 сыллаахха ВЭФ кэмигэр Президент боломуочуйалаах бэрэстэбиитэлин Юрий Трутнев көҕүлээһининэн саҕаламмыта. Бырагыраама чэрчитинэн РФ Президенэ Владимир Путин сорудаҕынан, Уһук Илин бары эрэгийиэннэригэр федеральнай бүддьүөттэн тиэргэннэри тупсаҕай оҥорууга үп көрүллүбүтэ.

Кэнники икки сыл иһигэр Хаҥалас улууһугар бу бырайыак чэрчитинэн хас да эбийиэк тутулунна. Ол курдук, Булгунньахтаахха, Тиит Эбэҕэ мини-пааркалар, Мохсоҕоллоох бөһүөлэгэр Бастакы тутааччылар сквердэрэ, Покровскай киинигэр оҕо оонньуур былаһаакката баар буолбуттара. Быйылгы сылга улуус киинин Кыыл Бастаах микро-оройуонугар эмиэ элбэх кыбартыыралаах дьиэ былаһааккатын, Күөрдэмҥэ уопсай дьиэ тиэргэнин тупсарыы дизайн-бырайыактара сүүмэрдээһини ааһан тураллар.

Тиэргэни уонна уопсастыбаннай сынньанар сири саҥатык оҥоруу олох хаачыстыбатын тупсарара биллэр суол. Бырайыак өссө биир үтүө өрүтэ — улахан эрэ куораттар кыттар буолбаттар, манна нэһилиэктэр эмиэ кытталлара үөрдэр.

— Биһиги нэһилиэкпит сайдарыгар улахан үлэ ыытыллан «Сарыал» Култуура киинин сиригэр 2022 сыл күһүнүгэр «1000 тиэргэн» бырайыагынан мини-паарка баар буолбута. Манна аныгылыы воркаут-зона, араас саастаах оҕолорго сөп түбэһэр оонньуур былаһааккалар, дьон олорон сынньанарыгар ыскаамыйалар, велосипеднай суол, футбол хонуута, хачыаллар бааллар. Күһүҥҥү-кыһыҥҥы хараҥаҕа паарка сирэ-уота эргиччи сырдатыллар. Бэлиэтээн эттэххэ, мини-паарка Тиит Эбэ дизайн-куодугар сиэттэрэн оҥоһуллубута. Билигин дьыл кэмиттэн тутулуга суох олохтоохтор сөбүлээн сынньанар, оҕолорбут оонньуур пааркалара нэһилиэкпит көстүүтүн тупсарар, киэркэтэр, — диэн Лилия Самсонова, 1-кы Дьөппөн нэһилиэгин баһылыгын солбуйааччы санаатын үллэһиннэ.

Ольга Гермогенова.

Хаартыскаларга:

  1. Тиит Эбэ мини-пааркатыгар оҕо куруук толору.

2. Булгунньахтаах мини-паарката.

3. Мохсоҕоллоох бөһүөлэгэр элбэх кыбартыыралаах дьиэни киэргэтэр мурал.

4. 2024 сылга Күөрдэмҥэ олоххо киириэхтээх былаһаакка бырайыага.

Читайте дальше