«Түмэл түһүлгэтэ» дьиэ кэргэннэри түмтэ

Эркээни ыһыаҕа-2024

Эркээни ыһыаҕар Г. В. Ксенофонтов аатынан Хаҥаластааҕы кыраайы үөрэтэр түмэл тэрийиитинэн Дьиэ кэргэн уонна оҕо саас сылыгар анаммыт дьиэ кэргэттэр сэдэх малларын «Түмэл түһүлгэтэ» быыстапка-куонкуруһа буолан ааста.  

Хас биирдии ыал бэйэтэ историялаах, ону кытта көлүөнэттэн көлүөнэҕэ бэриллэн иһэр ураты малы-салы илдьэ сылдьар. Бу быыстапка-куонкурус үүнэр көлүөнэни төрөөбүт норуотун материальнай-култуурунай нэһилиэстибэтигэр сыһыарар сыаллаах, сэдэх былыргы маллар историяларын үөрэтэр соруктаах тэрилиннэ.

Тэрээһиммит үөрүүлээх арыллыытыгар «Кыл-Кынат» бөлөх уонна Хаҥалас холбоһуктаах кыл төрүт толорооччулара кыттыыны ыллылар, салайааччы –  С. А. Зверев аатынан национальнай оркестр театрын солиһа, «Килбиэн» этно-ансаамбыл салайааччыта, СӨ ыччат политикатын туйгуна, өрөспүүбүлүкэтээҕи уонна Россиятааҕы куонкурустар лаурета Дьулустаан Никифоров буолар.

Быыстапка-куонкуруска Тиит Арыы, Бэстээх, Дьэр, 2-с Дьөппөн, Нөмүгү, Өктөм, 2-с Малдьаҕар нэһилиэктэриттэн уонна Покровскай куораттан барыта 15 дьиэ кэргэн кыттыыны ылла.

Быыстапка-куонкурус дьүүллүүр сүбэтигэр бэрэссэдээтэлинэн Галина Неустроева, искусствовед, музеевед, РФ уонна СӨ култууратын үтүөлээх үлэһитэ, Россия худуоһунньуктарын союһун чилиэнэ, СӨ Национальнай художественнай түмэлин сүрүн научнай сотруднига, СӨ норуотун маастара Александр Данилов уонна Наталья Тимофеева, Хаҥалас улууһун түмэлин сүрүн харайааччыта үлэлээтилэр.

Дьүүллүүр сүбэ үлэтин түмүгүнэн быыстапка-куонкуруска кыттыы иһин Туоһу суругу уонна биһирэбил бирииһи Өктөм нэһилиэгиттэн Варвара Христофорова, Тиит Арыыттан Дайаана Иванова туттулар. «Баай номохтоох мал» анал ааты Дьэр нэһилиэгиттэн Виктория Шепелева ылла, «Кэрэ көстүүлээх мал» аат Күөрдэмтэн Майя Свинобоеваҕа тигистэ, Покровскай куораттан кыттыбыт Давид Степанов «Мындыр оһуордаах мал» ааты ылла. «Сэдэх маллаах»  Мария Моисеева ааттанна, «Түҥ былыргы мал» хаһаайына Иван Амбросов, «Үйэлээх маллаах» Галина Семенова уонна “Үчүгэй туруктаах маллаах» Петровтар-Яковлевтар дьиэ кэргэннэрэ буоллулар. «Чочуйуллубут мал» анал аат Тиит Арыы нэһилиэгиттэн Галина Крюковаҕа тигистэ.

СӨ Национальнай художественнай түмэлин анал бирииһэ Чараҥтан Екатерина Канаеваҕа, Улахан Ааннааҕы “Дьөһөгөй” түмэл слайааччытыгар Парасковия Максимоваҕа туттарылынна.

«Түмэл түһүлгэтэ» быыстапка-куонкурус III чыпчаал кыайыылааҕынан Елена Максимова, (Тиит Арыы нэһилиэгэ) буолла; II чыпчаал — Александра Охлопкова (Нөмүгү нэһилиэгэ) Кылаан чыпчаал уонна сүрүн бириис телевизор туттарылынна Күөрдэмтэн кыттыбыт Екатерина Скрябинаҕа.

Хаҥалас улууһун кыраайы үөрэтэр түмэл  аатыттан барҕа махталбытын тиэрдэбит кэлэн үлэлэспит Галина Неустроеваҕа,  Александр Дмитриевичка уонна  Дьулустаан   Никифоров салайааччылаах «Кыл-Кынат» бөлөх уонна Хаҥалас холбоһуктаах кыл төрүт толорооччуларыгар. Тэрээһин кыттыылаахтарыгар баҕарабыт сайдам санааны, үтүмэн үөрүүнү!

Елена ФИЛИППОВА.