Олоҥхо ыһыаҕа
Бэс ыйын 20-21 күннэригэр Амма улууһугар 17-с төгүлүн Олоҥхо ыһыаҕа ыһыллар.
Ыһыахха барыта 15 тыһ. тахса киһи кыттара күүтүллэр. Сүрүн тэрээһиннэри тэрийиигэ уонна ыытыыга 3,5 тыһ. тахса киһи үлэлэстэ. Куонкурус уонна спорт күрэх-тэһиилэригэр 2 тыһ. тахса киһи улуустарынан уонна куорат уокуруктарыттан кыттара күүтүллэр.
Сүрүн тэрээһиннэр Муона чараҥа сиригэр Иннокентий Швердин аатынан ландшафтнай-этнографическай комплекс култуура уонна сынньалаҥ пааркатыгар ыытыллыахтара. Амма иһинэн ыһыах ыытыллар сиригэр диэри оптуобус сырыыта тэриллиэҕэ. Ыһыахтыыр сир туспа былаһааккатыгар аһылык, сынньалаҥ зоналара, 3 тыһ. тахса киһи түһэр аныгы балаакка куората тэрийиллэр. Ыһыах тэрээһинин кыттыылаахтарын аһатар уонна сытар миэстэлэринэн социальнай эбийиэктэр буолуохтара. Ыалдьыттары хоннорорго Амма, Чыпчылҕан, Бөтүҥ сэлиэнньэлэригэр чааһынай дьиэлэр бэриллиэхтэрэ диэн тэрийэр хамыыһыйа иһитиннэрэн турар.
Олоҥхо ыһыаҕын кэмигэр үгэс буолбут тэрээһиннэр ыытыллыахтара. Чаҕылхай күрэхтэһиинэн «Эр Бэрдэ» национальнай многоборьеҕа киирсии буолуоҕа. Ипподромҥа ат сүүрдүүтэ сэттэ дистанцияҕа ыытыллыаҕа.
Хаҥалас улууһуттан Олоҥ-хо ыһыаҕар улуус баһылыга Олег Иринеев салалталаах улахан дэлэгээссийэ кыттар. Култуураҕа уонна духуобунай сайдыыга управление салайааччыта Фекла Варламова иһитиннэрбитинэн, биир дойдулаахтарбыт култуура тэрээһиннэригэр анаан-минээн бэлэмнэннилэр. Ол курдук олоҥхону бөлөҕүнэн толорууга Покровскайтан Лидия Харитонова, Парасковья Лебедева, Мария Поисеева, Нөмүгүттэн Полина Семенова, Өктөм нэһилиэгиттэн Федора, Алексей Фоминнар, Андриан Белолюбскай, Руслан Игнатьев, Владимир Ушницкий, оҕолор ортолоругар олоҥхону толорууга Сиинэ нэһилиэгиттэн Нарияна Никодимова, 2-с Малдьаҕар нэһилиэгиттэн Владислав Афанасьев, Дархан Тихонов, Хачыкаат нэһилиэгиттэн Дима Сулейманов кытталлар.
— Иис түһүмэҕэр элбэх кыттааччылаахпыт. Нөмүгү нэһилиэгиттэн Дора Игнатьева салайааччылаах «Ситим» түмсүү иистэнньэҥнэрэ былыргы соннорунан, тирии иһиттэринэн кытталлар, Хачыкаат иистэнньэҥнэрэ кыбытык тигиинэн үлэлэрин илдьэ бардылар, Покровскай куораттан национальнай иискэ үлэлэринэн Анисия Фадеева, Анна Куличкина, Мария Шишигина уо.д.а. кытталлар. Төхтүр нэһилиэгиттэн Тапыевтар дьиэ кэргэнинэн хомус күрэһэр кытталлар. Хачыкааттан, Өктөмтөн чабырҕахсыттар бөлөхтөрө, дэгэрэҥ ырыаҕа Миралюба Саморцева, Никита Васильев (өктөмнөр), тойукка Светлана Кандинская, оһуокайга Светлана Харлампьева, Покровскайтан Изольда Максимова, Светлана Ильина хомуска, тойукка холонон көрүөхтэрэ. Ону сэргэ, мас, тимир уустарбыт бэйэлэрин оҥоһуктарын киэҥ түһүлгэҕэ көрдөрөн кытталлар, — диэн Фекла Романовна кылгастык Олоҥхо ыһыаҕын кыттыылаахтарын билиһиннэрдэ.
Өрөспүүбүлүкэтээҕи Олоҥхо ыһыаҕа 2006 сылтан араас улуустарга ыытыллан кэллэ. Киэҥ хабааннаах улахан бы-рааһынньыгы тэрийэргэ улуустарга саҥа социальнай эбийиэктэр тутуллаллар, култуура тэрилтэлэрин матырыйаалынай-тиэхиньиичэскэй базалара бөҕөргөтүллэр, суол-иис өрөмүөннэнэр уо.д.а. Эһиил Олоҥхо ыһыаҕа Нерюнгри улууһугар ыытыллыаҕа.
Ольга САМСОНОВА.