Хаҥалас улууһун ытык-мааны дьоно-сэргэтэ, күндү биир дойдулаахтарым!

Саха омук Үрдүк Айыыларга үҥэн-сүктэн уйгуну-быйаҥы түстүүр Үрүҥ Тунах Ыһыаҕынан улуус салалтатын аатыттан уонна тус бэйэм ааппыттан итиитик-истиҥник эҕэрдэлиибин!

Сэттэ ый тухары сэтэрээбит, аҕыс ый тухары аарыгырбыт тымныы кыһыммытын этэҥҥэ туораан, күөх окко үктэнэн, самаан сайыммытын көрсөр, өбүгэлэрбит үгэстэринэн Аар айылҕабытыгар сүгүрүйэр, уйгуну-быйаҥы түстүүр кэрэ-бэлиэ күммүт үүннэ. Күөх сирэм чэлгийэр, кэрии тыаҕа кэҕэ этэр, күндэл халлааҥҥа күөрэгэй ыллыыр кэрэ кэмигэр, Айыылар муҥутуур чугас буолар күннэригэр үтүөнү, үйэлээҕи ыралыыбыт, чугас дьоммутугар, аан дойдуга үчүгэйи эрэ баҕарабыт. Бу – өбүгэлэрбит саллар саастары, үтүмэн үйэлэри уҥуордаан кэлбит кэс тыллара, бэлэхтэрэ буолар, онубиһиги умнубакка, харыстабыллаахтык сыһыаннаһан, кэнчээри ыччаппытыгар тиэрдэр ытык иэстээхпит.

Күндү биир дойдулаахтарым! Ийэ айылҕабыт силигилээн ситэн, тупсан турар кэмигэр эһиэхэ хас биирдиигитигэр өҥ-быйаҥ олоҕу, чөл-чэгиэн туругу, этэҥҥэ буолууну баҕарабын. Бу күн алгыспыт тыла тиийдин дойдубут инникитин туһугар анал байыанный дьайыыга сылдьар хорсун буойуттарбытыгар, саллааттарбытыгар. Этэҥҥэ, кыайыылаах эргиллэн кэлээриҥ! Илин өттүгүт ибири билбэтин, кэлин өттүгүт кэнтиги көрбөтүн, кэлэр кэнчээри ыччаккыт кэскиллээх буоллун. Саргыбыт салалыннын! Үрүҥ Тунах ыһыаҕынан!

Уруй-туску! Айхал-мичил!

«Хаҥалас улууһа» МО баһылыга Олег ИРИНЕЕВ.