Ой Бэскэ умнуллубат ыһыах ааста

Өктөм маанылаах сиригэр Ой Бэскэ Россия үрдүнэн Дьиэ кэргэн, өрөспүүбүлүкэҕэ Оҕо саас, Хаҥалас улууһугар Дьиэ кэргэн уонна оҕо саас, Үөрэҕирии ситимин 150 сылларыгар анаммыт ыһыах олус тэрээһиннээхтик ааста.

Быйыл Ой Бэспитигэр олохтоох нэһилиэнньэ көҕүлээһинин өйүүр бырагырааманан урукку тутуулар барыта көтүрүллэн, саҥа тутуулар дьэндэйдилэр. Түһүлгэҕэ киирии аан уларытыллан, икки өттүттэн 12-лии сэргэ сэлэлии турда. Салгыы киирэн истэххэ Аар баҕах сэргэ турар, онтон биэлэр бааллар сэргэлэрин аастахха сиэр-туом ыытыллар сиригэр киирэн кэлэҕин, манна холумтан уонна кымыс сэргэлэрэ көстөллөр. Салгыы бардахха Илбийии сэргэтэ, кэнсиэртиир сир кэлэр. Спорт түһүлгэтэ элбэх киһи олороругар ананан тутуллубута харахха быраҕыллар. Бу тутуулары барытын Альберт Стрекаловскай салайааччылаах бэйэбит олохтоох уолаттарбыт биригээдэлэрэ тутан олоххо киллэрбиттэрэ дьону астыннарда.

Быйылгы ыһыахха дьон-сэргэ санаата кэлэн, алгыс ылаары, саҥа оҥоһуллубут сири көрөөрү тоҕуоруһа муһунна. Олохтоох алгысчыппыт Андриан Белолюбскай ис-иһиттэн үөрэн, астынан туран бар дьонун алҕаата, тойугунан толордо. Баһылык солбуйааччыта Акулина Максимова мустубут дьону улуу тунах ыһыаҕынан эҕэрдэлээтэ уонна “Өктөм нэһилиэгин бочуоттаах олохтооҕо” ааты Петр Алексеевка, үлэ бэтэрээннэригэр Клара Алексееваҕа уонна Анастасия Ивановаҕа туттарда.

Бу күн 4 түһүлгэнэн араас күрэхтэһии ыытылынна. Ол курдук, элбэх киһи сахалыы спорт күрэҕэр тоҕуоруһа муһунна. Күрэхтэһии хаамыытын дьоҥҥо Илья Шишигин билиһиннэрэн истэ. «Үс төгүл үс» көрүҥҥэ I миэстэни Кирилл Кузьмин ылан бырааттыы Сергей, Николай, ИванСитниковтар олохтообут 20 тыһ. солкуобай уу харчынан уонна спорт бэтэрээнэ Дмитрий Ивановтан 5 тыһ. сууммалаах сертификатынан наҕараадаланна, II миэстэлээхАлександр Мушников бырааттыы Ситниковтартан 15 тыһ. солкуобай,  III миэстэҕэ тиксибит Эдуард Рожков эмиэ бырааттыы Ситниковтар туруорбут 10 тыһ. солкуобайбириистэрин ылан астыннылар.

“Таас көтөҕүү” күрэҕэр Алексей Руфов I миэстэ буолан Михаил Слепцов туруорбут «Дружба Штиль 180» бирииһин, Семен Копырин II миэстэ буолан Шадриннар педагогическай династияларын 11 тыһ. солкуобай уу харчынан, Алексей Мушников III миэстэҕэ тиксэн «Макита» туттар тэрилинэн наҕараадаланнылар.

Хапсаҕайга 75 киилэҕэ диэри Николай Адъютантов I миэстэни ылан  Егор Жирков 20 тыһ. солкуобай, II миэстэлээх Илья Шишигин Анатолий Прокопьев туруорбут 10 тыһ. солкуобай уонна III миэстэҕэ тиксибит Дамир Шевелев «Ил Түмэн» депутата Валерий Федоров туруорбут бириистэрин ылан үөрдүлэр.

75 киилэттэн үөһээ ыйааһыннаахтарга Семен Копырин бастаан Өктөм орто оскуолатын 1986 сыллаах выпустара туруорбут 15 тыһ.солкуобай харчынан бириистэрин, Константин Захаров II миэстэ буолан олохтоох дьаһалта туруорбут беседкатын, Александр Алексеев III миэстэҕэ тиксэн олохтоох дьаһалта “Пикник” наборун ыллылар.

40 саастарыттан үөһээ бэтэрээннэргэ Николай Острельдин кыайан 20 тыһ. солк, II миэстэлээх Александр Захаров 15 тыһ. солк., Виталий Шишигин III миэстэни ылан Василий Елисеев туруорбут «Булчут» маҕаһыынтан 5 тыһ. солк. суумалаах сертификатынан бэлиэтэнэн харахтара уоттанна.

Хапсаҕайга кылаан кыайыылааҕынан Семен Копырин буолла уонна “Восток капитал” тэрилтэ туруорбут “Макита” инструменынан, Захаровтар дьиэ кэргэттэрэ туруорбут мүһэлэринэн, Андрей Шишигин Уус Алдантан төрүттээхтэр түмсүүлэрин 5 тыһ. солкуобай анал бирииһинэн наҕараадаланнылар.

Мас тардыһыыга 75 киилэҕэ диэри ыйааһыннаахтарга Данил Леонтьев бастаата, “Евгения” маҕаһыын (Константин Иванов) туруорбут пылесоһун уонна «Сайдам» маҕаһыын (Николай Наумов) бирииһин тутта. II миэстэлээх Эдуард Рожков бырааттыы Сергей, Николай, Валентин, Семен Никифоровтар туруорбут бириистэрин телевизор, III миэстэлээх Василий Бережнев Степан, ЮрийОстрельдиннар 5 тыһ. солк. уу харчынан бириистэрин туттулар.

75 киилэттэн үөһээ ыйааһыннаахтарга Александр Захаров I миэстэни ылан Алексей Демьянов уонна Анатолий Абрамов 50 тыһ. солк. суумалаахсертификаттарын, Константин Захаров II миэстэни ыланолохтоох дьаһалта туруорбут “Макита” инструменын, Эдуард Рожков III миэстэ буолан Степан Ильин 5 тыһ. солк. суумалаах сертификатын тутан үөрдүлэр.

Спортивнай күрэхтэн дьахталлар да туора турбатылар. Ол курдук, мас тардыһыытыгар  Лоридана Лепп  I миэстэни ылан Анна уонна Вячеслав Алексеевтар дьиэ кэргэттэрин, Татьяна Назарлиева II миэстэ буолан «Ил Түмэн» депутата Владимир Егоров, III миэстэлээх Мария Андреева Өктөм орто оскуолатын 1974 сыллаахха бүтэрбиттэр бириистэринэн наҕараадаланнылар.

«Өктөм сайдам ыала» күрэскэ 4 ыал кытынна. “Кылаан чыпчаал” ааты Варвара уонна Иван Христофоровтар ыланнар Уус Алдантан, Үөһээ Бүлүүттэн төрүттээх дьон түмсүүлэрин бириистэрин, I миэстэлээх Светлана, Владислав Ксенофонтовтар Кондаковтар дьиэ кэргэн уонна Ил Түмэн депутата Владимир Егоров бириистэрин, II миэстэни Светлана, Василий Баишевтар ылан Айсена Тимофеева бирииһин, III миэстэҕэ Ульяна, Виталий Осиповтар тиксэннэр нэһилиэк депутаттарын бирииһин ылан үөрдүлэр-көттүлэр.

Эркээни ыһыаҕар элбэх оҕолоох дьиэ кэргэттэр күрэхтэригэр биһиги нэһилиэкпититтэн элбэх оҕолоох Ксенофонтовтар дьиэ кэргэннэрэ кыттан 2 миэстэни ылан олус астынныбыт. Светлана уонна Владислав Ксенофонтовтар нэһилиэккэ, улууска, өрөспүүбүлүкэҕэбиллэр уопсастыбанньык дьон, икки кыыстарыгар ханыы сэттэ оҕону иитэ ыланнар олус кыһаллан иитэллэр, айымньылаах  үлэҕэ, олоххо бэлэмнииллэр. Бу дьиэ кэргэҥҥэ Чапаев сэлиэнньэтин олохтоохторо, ийэ кыыһынаан Сардаана Кардашевская уонна Наталья Кобякова бэйэлэрин бириистэрин туттардылар.

Нэһилиэк сайдарын  туһугар кыһаллар, патриот санаалаах спонсордарбытыгар Өктөм нэһилиэгин дьаһалтатын уонна олохтоохтор ааттарыттан барҕа махталбытын биллэрэбит. Өссө да биир сомоҕо буолан нэһилиэкпит чэчирии сайдарын туһугар үлэлэлээн-хамсаан, айан-тутан иннибит диэки баран иһиэххэйиҥ!

Федора Фомина, Өктөм с.