Бэс ыйа өрөспүүбүлүкэбитигэр спортивнай күрэхтэһиилэринэн уонна тэрээһиннэринэн баай буолла. Бу күннэргэ Өктөм нэһилиэгэр РСФСР, Саха АССР спордун маастара, СӨ норуотун хаһаайыстыбатын үтүөлээх үлэһитэ, «Гордость нации — 2020» бириэмийэ лауреата, 2015-2019 сс. СӨ ыстаҥаҕа федерациятын президенэ Анатолий Добрянцев сырдык аатыгар анаммыт сахалыы национальнай ыстаныыларга II Өрөспүүбүлүкэтээҕи аһаҕас турнир буолан ааста.
Бу күн Хаҥалас сиригэр араас улуустан чулуу ыстанааччылар кэлэн күрэхтэстилэр. Спортсменнар ыччат, эр дьон уонна дьахталлар бөлөхтөрүгэр арахсан кылыыга, куобахха уонна ыстаҥаҕа күөн көрүстүлэр.
Турнир туһунан Максим Оегостуров, СӨ ыстаҥаҕа федерациятын дириэктэрэ кэпсээтэ:
Бу күн турниры тэрийсээччи, «Сахаада-спорт» ассоциациятын президенэ, РСФСР и РФ спордун маастара, юридическэй билим дуоктара, профессор Александр Ким-Кимэн «Быстрее, Выше, Сильнее. Спортивные увлечения и жизненный успех Анатолия Добрянцева» кинигэтин сүрэхтэниитэ буолла.
— Киэҥ аймахтаах Анатолий Добрянцев спортан саҕалаан ситиһиилээх үлэ үөһүгэр сылдьыбыта. Уопсастыбаҕа чөл олоҕу көҕүлээн, төрүт үгэһи олохтооһуҥҥа, дьиэ кэргэн суолтатын үрдэтиигэ, норуоттар икки ардыларынааҕы сыһыаны күүһүрдүүгэ элбэх сыралаах үлэни ыыппыта кэскиллээх ыччаппытыгар улахан холобур буолар. Онон бу саҥа тахсыбыт кинигэҕэ Анатолий Добрянцев туһунан элбэх үтүө ахтыылар, санаалар киирбиттэрэ мээнэҕэ буолбатах, — диэн ааптар Александр Николаевич санаатын үллэһиннэ.
Турнир түмүгүнэн куобах, кылыы уонна ыстаҥа көрүҥнэрин көрдөрүүлэринэн ыччаттарга 3 миэстэҕэ спорт маастарыгар хандьыдаат М.К. Аммосов аат. ХИФУ устудьуона Георгий Софронов, 2 миэстэҕэ Чурапчы улууһуттан спорт маастарыгар хандьыдаат Афанасий Сибиряков уонна 1 миэстэҕэ Хаҥалас улууһуттан спорт маастарыгар хандьыдаат Артем Пермяков таҕыстылар. Дьахталларга Дьокуускай куораттан Аина Сон 3 миэстэҕэ, Маргарита Тумакова 2 миэстэҕэ уонна биһиги кыыспыт, Хаҥалас улууһуттан Валерия Олесова 1 миэстэҕэ тигистилэр. Эр дьоҥҥо 3 миэстэҕэ Горнай улууһуттан СӨ спордун маастара Кай Адамов, 2 миэстэҕэ Уус Алдан улууһуттан СӨ спордун маастара Ньургун Сокольников уонна 1 миэстэҕэ Таатта улууһуттан СӨ спордун маастара Андрей Васильев буоллулар.
Татьяна Владимирова.