Социальнай өйөбүл
Хаҥаластааҕы нэһилиэнньэ социальнай харыстабылыгар уонна үлэҕэ управлениетын социальнай көрүү-истии отделениетыгар реабилитацияланар техническэй туттар тэриллэри уларсык биэрэр пуун үлэлиир. Бу пуун сүрүн соруга – дьон доруобуйатын чөлүгэр түһэрэригэр быстах кэмҥэ босхо уонна төлөбүрдээх социальнай өҥөнү толоруу буолар. Пуун үлэтин туһунан социальнай үлэҕэ испэсэлиис Степан Нестеров кэпсээтэ.
— Биһиги пууммутугар доруобуйаларыгар хааччахтаах дьон, оһоллонон илиилэрин, атахтарын тоһуппут, ыалдьан кыайан хаампат эҥин түгэннэригэр кэлэн бэйэлэригэр сөптөөх анал тэрили – баттыктары, ходуноктары, кресло-кэлээскэлэри уларсык ылан туттуохтарын сөп. Инбэлииттэр тэрилинэн босхо туһаналлар, ону сэргэ байыаннай дьайыы кыттыылаахтара. Нэһилиэктэр олохтоохторугар эмиэ уларсабыт. Тэрили ылааччылары кытта икки ыйга дуогабар баттаһабыт, онтон хас күн чахчы туһаммыттарынан төлүүллэр. Прокат сыаната удамыр, холобура, улахан киһи баттыгын төлөбүрэ күҥҥэ 4 солк., телескопическай тайах мас (трость) — 1 солк., ходунок — 2 солк., медицинскэй орон — 13 солк.
Ый аайы уонча киһи хайаан да кэлэн уларсан барар. Ордук кырдьаҕас дьоҥҥо анаан тутуһан хаамар ходуноктары ылаллар. Тэрили уларсык ыларга паспорт куоппуйата, МСЭ ыспыраапката эбэтэр кыһалҕалаах киһи балыыһаттан маннык тэрилгэ наадыйарын туһунан ыспыраапка ирдэнэр. Биһиги аадрыспыт Покровскай куорат, Ини-бии Ксенофонтовтар уул. 25№-дээх дьиэ, 15№-дээх кабинет, билсэр телефон 8(4112) 32-65-36.
Ольга Гермогенова.