Дойду үрдүнэн олохтоох нэһилиэнньэ көҕүлээһинин өйүүр барыл үлэлээн өрөспүүбүлүкэ, улуус, нэһилиэк аайы араас үлэлэр ыытыллаллар.
Бу сайын Өктөм нэһилиэгин Ой Бэс сиригэр нэһилиэнньэ көҕүлээһининэн ыһыахтыыр түһүлгэ саҥардылынна. Ой Бэс түһүлгэтигэр Айыылар Ааннарын, киириигэ сэлэлии турар 12-лии сэргэлэр, Аар баҕах, кымыс иһэр сиэрин толорор күрүө, илгэ сэргэтэ, кэнсиэр ыытыллар сыаната, ыскаамыйалар, ураһалар саҥаттан тутулуннулар. Манна олохтоох нэһилиэнньэ көҕүлээһинин өйүүр бырагырааманан 2 964 772,92 солк. көрүлүннэ. Онтон 1 570 000 солк. өрөспүүбүлүкэ бүддьүөтүттэн уонна 1 394 772,92 солк. олохтоох бүддьүөттэн. Эбии сэргэлэри оҥорууга 1 300 393,40 солк. ыытылынна.
Бэлиэтээн этэр буоллахха, олохтоох көҕүлээһини өйүүр барылынан Хаҥалас улууһугар быйыл 38 000 000 солк. судаарыстыбаннай бүддьүөттэн, 12 211 243 солк. улуус, 1 260 260 солк. нэһилиэктэр бүддьүөттэриттэн уонна 5 250 000 солк. спонсордартан көрүллэн олох-дьаһах тупсарыллар, дьон-сэргэ сынньанар сирэ саҥардыллар.
Татьяна Владимирова.