РСФСР Үрдүкү Сэбиэтигэр, Россия Судаарыстыбаннай Думатыгар уонна Саха өрөспүүбүлүкэтин Ил Түмэн Үрдүкү Мунньаҕар дьокутаатынан талыллан үлэлээбит, биллиилээх судаарыстыбаннай уонна политическай диэйэтэл З.А. Корнилова 85 сааһын бэлиэтээһиҥҥэ сырыттым.
Үс таһымнаах быыбардарга үһүөннэригэр, З.А. Корнилованы биһиги, хаҥаластар, улаханнык өйөөммүт дьокутаатынан талан турардаахпыт.
Зоя Афанасьевна ону билинэр уонна хаҥаластарга мэлдьи махталлаах. Тус бэйэм санаабын этэбин: — История уонна ону-маны удумаҕалыыр дьон-норуот – сахалар дэнэр омуктар 1993 с. иэдээннээх күҥҥэ-дьылга сэбиэскэйи танкаттан ытыалыыр ыар кэмнэргэ «Үрүҥ Дьиэ» көмүскэлигэр кыттыбыт-сылдьыбыт, хас хорсун киһилээххитий? диэн ыйытыахтарын сөп курдук.
Биһиги Зоя Афанасьевнаны өйөөбүт дьон, киэн туттаммыт, саха омуктан сэбиэскэйи көмүскээбит хорсун дьокутааппыт З.А. Корнилова диэн этэр бырааптаахпыт. Эбээн норуотун хорсун-хоодуот уола, народнай суруйааччы А.В. Кривошапкин «Үрүҥ дьиэ» көмүскэлигэр 1993 с. дьиҥ-чахчы бассабыыктыы, бигэтик туран, устуоруйаҕа үтүө өрүтүнэн киирбитэ. Ол кэмнэрдээҕи дьокутааттарбыт 100 бырыһыан «Үрүҥ дьиэттэн» куотан тахсыбыттара эбитэ буоллар, балаһыанньа диэххэ, сахаларга мөлтөһүөр буолуо этэ диибин…
«Тыһыынча киһи хараҕа – таҥара хараҕа» дииллэринии З.А. Корнилованы быыбардааччылар бары быыбардарга мэлдьи өйөөбүттэрэ, куоластарын биэрбиттэрэ. З.А. Корнилова биһиги уокуруктан талыллан үлэлиир кэмигэр уонунан сылларга кыайтарбатах бытыктаах тутууну – ТХНЧИ үлэһиттэригэр аналлаах 48 кв. дьиэни үлэҕэ киллэртэрбит үтүөлээх-өҥөлөөх. Ол кэмнэргэ бүддьүөтэ суох быыһык ыарахан сылларга Зоя Афанасьевна Саха өрөспүүбүлүкэтин бырабыытылыстыбатын бэрэссэдээтэлин С.Н. Назаровы кытта кэпсэтэн дьиэни «долевой» кыттыгас диэн көрүҥүнэн ситэттэрэн турардаахтар. Оччоттон баччаҕа диэри «дьаранаас» үптээх-харчылаах тыа хаһаайыстыбата, ити дьиэни тааҕытаах сүтэрэр-былдьатар мөлтөх туруктааҕа. Киһитэ Зоя Афанасьевна буолан бу дьиэни быыһаан турардааҕын, бэрт аҕыйах киһи билэр буолуохтаах. Зоя Афанасьевна саха дьахталларыттан аан бастакынан экономика билимин кандидата диэн үрдүк ааты сүкпүтэ. Биир бастакынан РСФСР үтүөлээх экономиһынан буолбута.
Кавказка сэрии уота күүдэпчилэнэ умайбытыгар З.А. Корнилова РСФСР Үрдүкү Сэбиэтин аатыттан миротворческай бөлөҕү салайан кутталлаах командировкаларга кииртэлии сылдьыбыта. Р. Хасбулатов, Р. Абулатинов курдук Россия таһымнаах Кавказ ааттаах-суоллаах, номоххо киирбит салайааччылара Зоя Афанасьевнаны билинэллэрэ, ытыктыыллара. Государственнай Дума үлэтигэр Зоя Афанасьевна «Народовластие» диэн Н.И. Рыжков салайар дьокутааттар фракцияларыгар киирэн, олус таһаарыылаахтык, көдьүүстээхтик үлэлээбитэ. Зоя Афанасьевна курдук, 350 Гос. Думаҕа үлэлиир дьокутааттар ортолоругар иҥэн-сүтэн хаалбакка, биллэрдик-көстөрдүк үлэлээбит дьокутаат суох курдук сахаларга. Россия президенин Б.Н. Ельцины, үрдүк трибунаттан, З.А. Корнилова суверенитет мөккүөрүгэр – «Борис Николаевич, эн биир мунньахха эппиккин, атын мунньахха уларытан этэргин хайдах өйдүөххэ сөбүй?» диэн кытаанахтык ыйыппытын киин ТВ биэриитигэр уу харахпынан көрбүтүм, эт кулгаахпынан истибитим. Ол кэмнэргэ «Парламентский час» диэн биэриигэ Зоя Афанасьевнаны чаастатык таһаараллара, көрдөрөллөрө.
Бу күни Саха өрөспүүбүлүкэтин ытык олохтооҕун, биллиилээх дьокутааты З.А. Корнилованы үбүлүөйүнэн эҕэрдэлээтилэр – саха өрөспүүбүлүкэтин парламенын салайааччылара – А. Еремеев, А. Жирков, Е. Ларионов, Государственнай Мунньах кэмитиэтин салайбыт дьокутааттар Ю. Николаев, Е. Голомарева, Б. Бубякин, О. Федорова, О. Васильева, Саха өрөспүүбүлүкэтин вице-президиэнэ Е. Михайлова, үп-харчы миниистиринэн үлэлээбит А. Кугаевскай, «Үрүҥ дьиэ» көмүскээччитэ народнай суруйааччы А. Кривошапкин уонна З.А. Корнилованы мэлдьи өйөөбүт кэккэ табаарыстар. Саха сирин ытык олохтооҕор З.А. Корниловаҕа, биллиилээх салайааччы С.П. Сидорова аатынан бириэмийэни Ил Түмэн Судаарыстыбаннай Мунньах бэрэссэдээтэлэ А. Еремеев туттарда.
Ермолай Скрябин.