Биир күн — окко
Самаан сайын үгэннээн турар куйаас кэмнэригэр от ыйын 25-26 күннэригэр, Покровскай куорат “Эргис эр дьонун түмсүүтэ” уопсастыбаннай тэрилтэ үлэҕэ көхтөөх аҕалара Александр Рожин, Андрей Дьяконов, Сергей Теплых, Петр Дмитриев, Радислав Скрябин буолан, сыллата ыытар “Биир күн окко” үтүө санаа акциябытын олоххо киллэрдибит. Икки күн устата орто үүнүүлээх ходуһаҕа бугуллаан уонна 2 -лии туонналаах 4 оту кээһэн кэллибит. Хас биирдии аҕа оҕо эрдэҕиттэн сыстыбыт, хара үлэтиттэн саараан турбакка, 30-тан тахса кыраадыс итииттэн-куйаастан чаҕыйбакка дьоһуннаах үлэни толордо.
Тыа сирин хас биирдии кэтэх сүөһүлээх, сылгылаах дьоно-сэргэтэ чахчы да бары сүрэхтээх-дьаныардаах дьон. Кыһыннары-сайыннары биир күнү өрөөбөккө үлэлииллэр. Өбүгэлэрбит төрүт дьарыктарын ыһыктыбакка илдьэ сылдьар дьүккүөрдээх туруу үлэһиттэр. Оннук дьон ахсааныгар I Дьөппөн нэһилиэгин Хоточчутун олохтоохторун, үтүөкэннээх дьону Дмитрий Заболоцкайы уонна Григорий Леверьевы киллэрэбин.
—Тыа ыалларын быһыытынан биһиги биллэхпинээн Дмитрий Ильичтиин холбоон, уопсайа 20-чэ сүөһүнүкыстатабыт. Быйылгы от үүнүүтэ наһаа үчүгэйэ суох, үрдүк сирдэр мөлтөхтөр, орто диибит. Былырыын бу Хаас сайылыыр диэн арыыттан 12 төбө оту ылбыппыт. Маны бүтэрдэхпитинэ Саһыл ойоос диэн сиргэ баран оттуохпут. Онно 10 оту ылар ходуһалаахпыт, билигин күн былдьаһыга. Покровскайтан аҕалар кэлэҥҥит олус туһалаах үлэни ыыттыгыт, улахан көмөнү оҥордугут,— диэтэ махтанан туран Григорий Степанович.
Киһи киһинэн олорор, үтүө санаа, хардарыта көмөлөсүһүү өрүү баар буолуохтаах. От үлэтигэр кыттан, Хоточчу олохтоохторун барҕа махталларын, үтүө алгыстарын истэн, санаабыт күүһүрэн сылаалаах үлэттэн сылайыы дуоһуйуутун ылан кэллибит.
2024 сыл модун Россиябытыгар Дьиэ кэргэн сылынан биллэриллэн турарынан, быйылгы тэрээһиммитин эдэр да, саастаах да аҕаларга анаатыбыт. Ыал аҕата үтүө сүбэһит, истиҥ дьиэ кэргэн аҕа баһылыга уонна кэргэнигэр бэриниилээх доҕор. Ыал аҕата ону таһынан үлэһит бастыҥа. Кини тиритэ-хорута үлэлии сылдьара, дьонун-сэргэтин туһугар кыһаллара, бу олус тэтимнээхтик сайда турар үйэҕэ, ону таһынан дьалхааннаах кэмҥэ халыҥ хахха, суон дурда буолара – ыал ийэтин дьоло, ыал кэскиллээх түһэ!. Онон сарсыҥҥы күммүт саргылаах, кэлэр кэммит кэскиллээх буола турдун.
Уйбаан УЙГУУРАП, Эргис эр дьонун түмсүүтүн салайааччыта.