Аан Дойдутааҕы аҕам саастаахтар күннэрин чэрчитинэн Төхтүр нэһилиэгин «Саһарҕа» пенсионердар түмсүүлэрин көҕүлээһининэн быйыл үһүс төгүлүн аҕыс көрүҥҥэ улуустааҕы «Төлөннөөх сүрэхтэр» спартакиада ыытылынна.
Чөл, чэбдик олоҕу кэрэхсиир, спорду олохторун аргыһа оҥостубут дьоммут сарсыарда эрдэттэн айаннаан кэлэннэр барыта 8 хамаанда буолан күөн көрүстүлэр, сытыы киирсиилэри көрдөрөн кыайыы өрөгөйүн биллилэр.
Күрэх арыллыытыгар эҕэрдэ тылы Төхтүр нэһилиэгин баһылыга Кэскил Багдарыын, улуус спортка управлениетын испэсэлииһэ Роман Протодьяконов, улуустааҕы бэтэрээннэр сэбиэттэрин бэрэссэдээтэлэ Данил Аргунов эттилэр.
Күн устата ыытыллыбыт күрэхтэһии биирдиилээн көрүҥнэригэр миэстэлэстилэр:
Дуобакка Өктөм хамаандата бастаата, иккис -2-с Дьөппөн, үһүс — Төхтүр нэһилиэгин хамаандата.
Саахымакка: 2-с Дьөппөн хамаандата кыайда, 2-с миэстэ — нөмүгүлэр, 3-с миэстэ — булгунньахтаахтар.
Остуол тенниһигэр: Нөмүгү хамаандата иннин биэрбэтэ, 2-с миэстэ — булгунньахтаахтар буоллулар уонна 3-с миэстэҕэ Покровскай куорат хамаандата тигистэ.
Дартска: кыайыылаах Булгунньахтаах хамаандата, 2-с миэстэҕэ — Төхтүр, 3-с миэстэ — 2-с Дьөппөн.
Хабылыкка: Нөмүгү хамаандата бастаата, 2 миэстэ Покровскай хамаандата, 3-с миэстэ — 2-с дьөппөннөр буоллулар.
Хаамыскаҕа: бастыҥ көрдөрүүлээх нөмүгүлэр буоллулар, 2 миэстэ — Өктөм хамаандата уонна 3 миэстэҕэ Покровскай хамаандата тигистэ.
Буулдьанан ытыыга: Өктөм хамаандата бастаата, иккис — покровскайдар уонна нөмүгүлэр 3-с миэстэни ситистилэр.
Корнхол диэн сонун көрүҥҥэ: Булгунньахтаах хамаандата кыайда, Өктөм хамаандата 2-с миэстэ буолла уонна 3-с бочуоттаах миэстэ Нөмүгү хамаандата буолла.
Уопсай хамаанданан түмүккэ 1-кы миэстэҕэ нөмүгүлэр, 2-кэ булгунньахтаахтар уонна 3-кэ Покровскай куорат спортсменнарын хамаандата тиксэн кыайыы өрөгөйүн биллилэр. Миэстэлэспит хамаандалар анал кубоктарынан, мэтээллэринэн, биһирэм бириистэринэн наҕараадаланнылар. Россияҕа Дьиэ кэргэн сылын чэрчитинэн элбэх оҕолоох, тыыл бэтэрээнэ, Төхтүр нэһилиэгин Бочуоттаах олохтооҕо Мария Ильинична Перфильева кыра кыыһа, эмиэ бэйэтэ улахан дьиэ кэргэн ийэтэ, эбээтэ Лена Васильева корнхол көрүҥэр бастыҥнарга бэйэтин анал бирииһин туттарда. Бу курдук олохтоох дьаһалта, улуус спортка управлениетын салайааччыта Виталий Прокопьев мэтээллэринэн, «Эркээни» Култуура киинэ сылаас аһынан хааччыйан күрэхпит спорт бырааһынньыгын быһыытынан үрдүк таһымҥа ааста.
Мотрена Ефремова, Төхтүр нэһилиэгин бэтэрээннэрин сэбиэтин бэрэссэдээтэлэ.