Истиҥ тылынан
Киһи ахтылларын тухары тыыннаах дииллэр. Онтон кинигэ таҕыстаҕына өссө уһун үйэлэнэр. Өр сылларга алтыһан ааспыт кэллиэгэбитин, ССРС култууратын туйгунун ахтан-санаан дьоҕус кинигэни таһаардыбыт.
Олоҕун култуураҕа анаабыт киһи кини буолар. Төһө даҕаны балтараа сааһыттан ийэтэ өлөн, тоҕуһун ааһаатын кытары аҕата күн сириттэн баран төгүрүк тулаайах хаалан төрөөбүт Сунтаарын Оҕо дьиэтигэр улааттар, Анна Саввинова син харса суох үлэлээн, бэрт кыһалҕалаахтык да буоллар култуура сырдатар училищетыгар, салгыы Хабаровскайга институкка үөрэнэн исписэлиис буолан Горнай оройуонугар, онтон отутунан сыл Хаҥаласка үлэлээн, бу сири иккис дойду оҥостон олорбута. Ковиды арыы кэмигэр сүрэҕинэн ыалдьан күн сириттэн күрэммитэ сарсын үс сыла буолар. Ыал буолбатаҕа, оҕо-уруу тэниппэтэҕэ, үлэтинэн олорбута. Үчүгэйдик үлэлээбитэ, сэбиэскэй кэмҥэ «АКБ Анята» дэниэр диэри култуура-агитационнай биригээдэтигэр түбүгүрбүтэ.
Аан дойдуга чороҥ соҕотох буолуу туох үчүгэйдээх буолуой. Олэрээри Анна Герасимовна хаһан даҕаны доҕотторунан тутайар диэни билбэтэҕэ. Алтыһан ааспыт дьонугар муҥура суох махталлааҕа. Хаҥаластарга махталлааҕа, үллэр үйэтигэр сылааска олордун диэн таас дьиэҕэ кыбартыыра биэрбиттэригэр. Киһи киһитэ этэ Анна Саввинова, дьоҥҥо үтүөнү эрэ баҕарар сырдык дууһатынан, үлэтигэр бэриниилээҕинэн, кыһалҕаны билбит аһыныгас сүрэҕинэн, олоххо тардыһыытынан. Ол туһунан кинигэҕэ эриэккэс ахтыылар киирдилэр, улууспут бибилэтиэкэтиттэн билсиэххитин син.
Бу манна Анна Герасимовна олоҕо култуурабыт икки үйэ кирбиитигэр оруола көстөр. «АКБ»-лар сылдьыбатах, кэнсиэртээн, субуотунньуктаан ааспатах сирдэрэ Хаҥаласка, бука, суох буолуо. Үгүс үлэ дьоно хонууларга, сайылыктарга бу биригээдэлэри үөрэ-көтө, сэргэхсийэ көрсөллөрө, ол иһигэр биһиги Анябытын, кини хатыламмат ырыаларын, сценкаларга оонньууларын, араас ыытар тэрээһиннэрин, бииргэ алтыспыт дьонноро — мүлчүргэннээх айаннарын. Дэриэбинэ олохтоохторо өрүү кэтэһэллэрэ, ырыалаах-тойуктаах кэлэллэрин, сонуннарын үллэстэллэрин. Анна Саввинова уус-уран самодеятельность көрүүлэригэр хуордары бэлэмниирэ, чугас дьүөгэлэрэ кини тарбаҕар талааннааҕын, иистэнньэҥ мааныта буоларын, кыраттан да үөрэрин уонна олус сэмэйин билэбит. Үтүө киһи олорон ааспыта диэн ахта-саныы сылдьыахпыт.
Дьүөгэлэрин, доҕотторун ааттарыттан
Людмила АММОСОВА.