СӨ Бастакы президенэ Михаил Николаевка анаммыт декада улууска түмүктэнэн эрэр. Покровскайдааҕы Оҕо искусствотын оскуолатыгар «Музыка барыбытыгар» уонна «Бары уруһуйдуубут» бырайыактар чэрчилэринэн искусство оскуолаларын үөрэнээччилэрин, преподавателларын кэнсиэрэ тэрилиннэ.
Улуу биир дойдулаахпыт үтүө аатын үйэтитэргэ туһуламмыт маннык тэрээһин былырыын кини төрөөбүт күнүгэр аан бастакытын тэриллибитэ уонна, номнуо үтүө үгэскэ кубулуйан, быйыл улуус, култуура, үөрэх салалтатын бэрэстэбиитэллэрэ, муниципальнай тэриллиилэр баһылыктара ыалдьыттаах ааста.
Кэнсиэри Покровскай, Мохсоҕоллоох Оҕо искусствотын оскуолаларын хомуур оркестра өрөспүүбүлүкэбит өрөгөй ырыатынан арыйда. Ону сэргэ талааннаах үөрэнээччилэр араас инструмент доҕуһуоллаах бииртэн биир ураты нүөмэрдэрэ киэргэттилэр. Дьулустаан Никифоров салайааччылаах «Кыл кынат» бөлөх кырыымпаҕа толоруулара көрөөччүлэр биһирэбиллэрин тутта.
Михаил Ефимович Николаев сырдык аатыгар, өрөспүүбүлүкэбит, дойдубут сайдыытыгар үлэлээн, айан-тутан ааспыт дьоһун олоҕо умнуллубат, кини ыллыктаах этиилэрэ-ыйыылара салҕааччылардаах уонна өрүү да сыаналана туруо диэн кинини кытта алтыһан, бииргэ үлэлэһэн ааспыт дьон — Саха сирин норуодунай суруйааччыта Павел Харитонов-Ойуку, Оҕо ойуулуур-дьүһүннүүр оскуолатын дириэктэрэ Александр Харитонов эҕэрдэ тылларыгар эттилэр.
Ольга Гермогенова.