Дьокуускайга Өксөкүлээх аатынан Норуоттар доҕордоһууларын дьиэтигэр дьоро киэһээ буолан ааста. Хаҥаластан общественнай-политическай диэйэтэл, СӨ V-с ыҥырыылаах Судаарыстыбаннай Мунньаҕын (Ил Түмэн) бэрэссэдээтэлин солбуйааччытынан үлэлии сылдьыбыт, «Потомки государевых ямщиков» тэрилтэни тэрийэн үлэлэппит Анатолий Добрянцев туһунан кинигэ сүрэхтэниитэ уонна Үөдэй сэлиэнньэтин «Вечорка» норуот фольклорун кэлэктиибин 40 сыла киэҥ уораҕай толору киһилээх буолан ааста.
Анатолий Добрянцев туһунан кинигэ билиһиннэриитигэр
Тыл кэрэтинэн СӨ Судаарыстыбаннай Мунньаҕын (Ил Түмэн) бэрэссэдээтэлин солб. Александр Жирков устудьуон эрдэҕиттэн олоҕун устата доҕорун, кэллиэгэтин Анатолий Добрянцев туһунан мустубут дьоҥҥо билиһиннэрдэ. Бу уон оҕолоох боростуой ыал улахан уоллара бэйэтин дьулуурунан, үлэһитинэн бөдөҥ салайааччы буола үүммүт эрэ буолбакка, бүтүн Россияҕа умнулла быһыытыйбыт дьаамсыктар историяларын, хатыламмат култуураларын үөрэтиигэ киэҥ хамсааһыны таһаарбыт судаарыстыба киһитэ буоларын үрдүктүк сыаналаан сөҕө-махтайа бэлиэтээтэ, Ийэ дойдуга тапталы, бэриниилээх буолууну иитиигэ дьоһун холобур буоларын эттэ. Кини биһиги чулуу общественниктарбытын, энтузиаст дьону төрдүнү-ууһу үөрэтиигэ Галина Макарова, дьаам култууратын сайыннарыыга Ирина Стрекаловская, Надежда Скрябина, Василий Кулагин, Анатолий Соколов о.д.а. сүдү үлэлэрин, эдьийдии балыс Галина Шадрина, Юлия Дьячкова саха норуотун кэскилин түстэспит Илья Шадрины киэҥ эйгэҕэ таһаарыыга сүдү кылааттарын этэн аһарда уонна салгыы үлэлиэххэ диэн ыҥырда.
Элбэх киһи тыл эттэ, Анатолий Добрянцев дэгиттэр талаанын, дьоҕурун арыйдылар – айылҕа харыстабылыттан саҕалаан спортка тиийэ. Александр Подголов, Яков Заровняев, Леонид Спиридонов, Юта Стрекаловская о.д.а. ахтыылары оҥордулар. Биһиги сорукпут – үтүө дьоммут дьоһун холобуругар төрдүнү-ууһу үөрэтии, аны онон Россия таһымыгар тахсыы, дьаам атыгар, дьаамсыкка паамытынньыгы оҥоруу, Покровскайга Г.В. Ксенофонтов аатынан кыраайы үөрэтэр түмэлгэ экспозицияны туруоруу, дьоммут дьоһун аатын кэскиллээхтик үйэтитии. Махтал тылларын бар дьонугар Добрянцевтар дьиэ кэргэттэрэ тириэртилэр.
«Вечоркалар» норуодунай кэлэктиип буолар ааттарын бигэргэттилэр!
Бу дьоро киэһэни дьаам култууратын тарҕатыыга, сөргүтүүгэ биир бастакынан ылсыбыт Үөдэй сэлиэнньэтин «Вечорка» норуот фольклорнай кэлэктиибэ тэриллибитэ 40 сылын үөрүүлээх кэнсиэрэ киэргэттэ. Үөдэйтэн отучча киһи кэлэн кытынна. Бу араас идэлээх, оҕолоох-уруулаах күннэтэ сүөһү-ас көрүүтүн түбүгэр сылдьар тыа дьоно бириэмэ булан дьаам фольклорун – ырыатын-үҥкүүтүн, оонньуутун сөргүтэ уонна салгыы эдэр ыччакка тириэрдэ сылдьара кэрэхсэниэн эрэ сөп.
Дьоро киэһэ ансаамбылы тэрийбит Антонина Калыткина, былыргы ырыалары, оонньуулары, үгэстэри ыччаттарыгар хаалларбыт бэтэрээннэр ахтылыннылар. «Вечорка» үлэтин аны учуонайдар интэриэһиргииллэрэ этилиннэ.
Үчүгэйэ диэн аҕам саастаах дьону (ол иһигэр 80 сааһыгар үктэммит Тамара Кузьмина) кытары ансаамбылга эдэр ыччат, оҕолор кытары кытталлар. Ол курдук, эдэркээн хормуоскаһыт Алеша Филиппов, ньуосканан музыка таһаарар кыргыттар бөлөхтөрө, Анна Степанова ырыалара сонуннук көһүннүлэр. Бу киэһэ үөдэйдэр ыал буолуу сиэриттэн-туомуттан хоробуотугар тиийэ көрдөрдүлэр. Таптыыр «При лужке», «Деревенька моя», «Ой мороз, мороз…» онтон да атын нуучча ырыаларын истэн астынныбыт, тэҥҥэ ыллаһа олордубут. Кэнсиэр дьаам дьонун сэргэ казактар фольклордарын билиһиннэрдэ.
Бу кэнсиэр түмүгүнэн «Вечорка» норуот кэлэктиибэ буолар аатын бигэргэттэ!
Ансаамбыл, кини кыттыылаахтарын чулуу дьоно сибэкки, СӨ култуураҕа уонна духуобунай сайдыыга министиэристибэтиттэн Эҕэрдэ, Махтал суруктары, ансаамбыл 4 чилиэнэ «СӨ уус-уран самодеятельноһыгар кылаатын иһин» бэлиэни, улууспут дьаһалтатыттан наҕараадалары туттулар.
«Вечорка», эҕэрдэ!
Людмила Мордовская.
Ааптар хаартыскаҕа, видеоҕа түһэриитэ.