Күндүттэн күндү киһибит, тапталлаах кэргэним, аҕабыт, эһэбит, хос эһэбит барахсан Жуков Егор Петрович орто дойдуттан күрэммитэ бу дьыл ахсынньы 13 күнүгэр 40 хонугун туолар.
Кини 1951 сыл ыам ыйын 2 күнүгэр Чараҥ нэһилиэгэр II Маалтааныга Мария Алексеевна, Петр Парфенович Жуковтарга бэһис уолунан күн сирин көрбүтэ.
Сыралаах үлэтэ ахтыллар
Үлэтин 1969 сылтан «Өктөм» сопхуос Бэстээхтээҕи отделениетыгар рабочайынан саҕалыыр. 1971-73 сылларга Сэбиэскэй аармыйаҕа Забайкальскай байыаннай уокурукка Кяхта куоракка ПВО сулууспалаабыта. Аармыйаттан кэлээт да Чараҥ учаастагар «Өктөм» сопхуоска үлэҕэ киирэр, 1974 манна биригэдьииринэн ананар. Ол күһүн Орджоникизевскай оройуон ССКП кэмитиэтин мэктиэлээһининэн Дьокуускайга каадырдары үөрэтэр тыа хаһаайыстыбатын техникумугар үөрэххэ туттарсан киирэр. 1977 сыл атырдьах ыйыгар үөрэҕин ситиһиилээхтик бүтэрэн «Булгунньахтаах» сопхуос Бэстээхтээҕи отделениетыгар Чараҥ учаастагар биригэдьииринэн ананан үлэлиир. Тыа сиригэр үлэ күөстүү оргуйар. Онтон 1979 сыллаахха муус устарга Бэстээх отделениетыгар управляющайынан үлэтин салҕыыр.
«1980 с. Алар сайылыгар электрическэй уоту киллэрэри туруорсан, дизельнай станция туруоран саас сайылыкка тахсарга дьиэлэргэ электрическэй уот киирбитэ. 1981 с. биир саамай наадалаах үлэ — Чараҥ учаастагар бары оттуур алаастары уонна Ампаар Бүтэйигэр үрэҕи хабан 30 км усталаах үс мастаах остуолба күрүө төгүрүччү оҥоһуллубута. Ампаар Бүтэйигэр АВМ диэн агрегат таҥыллан үлэҕэ киирбитэ. Ол түмүгэр “Булгунньахтаах”сопхуос бары отделениета күөх, битэмииннээх от мээккэтинэн уонна сиилэһинэн хааччыллара ситиһиллибитэ.
Егор Петрович эдэркээн сааһыттан арахсыыта суох «Булгунньахтаах» сопхуос Бэстээхтээҕи отделениетыгар биригэдьииринэн, управляющайынан хомуньуустуу ис сүрэҕиттэн бэриниилээхтик, үтүө суобастаахтык үлэлээбитэ. Отделение үлэтэ-хамнаһа, үлэһит дьон олоҕо-дьаһаҕа кини быһаарыылаах дьаһалыгар тирэнэрэ, улаханнык ытыктанар салайааччы этэ. Дьоҥҥо-сэргэҕэ эйэҕэс, сытыары сымнаҕас сыһыаннааҕа. Быдан дьылларга быраһаай, ытык киһибит Егор Петрович» — , диэн ахтар Раиса Алексеевна Архипова.
Ханна да үлэлээтэр биһиги аҕабыт үлэтин түмүгэ ситиһиилээх буолара. 1986-89 сылга диэри гидрогеология подсобнай хаһаайыстыбатыгар зоотехнигынан үлэлээбитэ. Манна подхозка сылгы иитиитинэн дьарыгыран Бэстээх үрэххэ база аһан 250 төбө сылгыны тутан үлэлэппитэ.
1989 с. дойду үрдүнэн уларыйыы барар, тыа хаһаайыстыбатыгар уустук балаһыанньа үөскээн Бэстээхотделениятыгар механигынан икки сыл үлэлиир. 1990 сыллаахха оройуон дьокутаатынан талыллан, ол кэмҥэ дойду үрдүнэн урут быраҕыллыбыт тыа сирдэрин туһаҕа таһаарар бырагыраама тахсан, Чараҥ — Бэстээх суолун былааҥҥа киллэрэллэрин туруорсубута уонна оҥоһулларын ситиспитэ.
Уһун сыллар усталарыгар кини олохтоох, ону сэргэ оройуон Сэбиэтин дьокутаатынан үлэлээбитэ. 2003-2018 сс. дылы Хаҥаластааҕы Ойуур хаһаайыстыбатыгар участковай лесничэй көмөлөһөөччүтэ этэ. Үлэтин таһынан Егор Петрович нэһилиэк иһигэр ыытыллар тэрээһиннэргэ актыыбынайдык кыттара, Бэстээх нэһилиэгин бэтэрээннэрин сэбиэтин салайан үлэлээбитэ. Ону таһынан барыбытын түмэн аймах ыһыаҕын тэрийбитэ. Үлэтиттэн быыс булан Национальнай архыыптан киирэн биһиги төрөппүтүн, хос-хос эһээбитин булан 1781 сылтан бэттэх төрүччү таблицатын оҥорбута. 2014 с. бастакы аймах ыһыаҕын Чараҥҥа тэрийбитэ. Онно 100-тэн тахса киһи кэлэн ирэ-хоро кэпсэтэн «Чараҥ Жуковтара» диэн бастакы аймах кинигэтэ тахсарыгар 2015 с. улахан сыратын уурбута, убайдарын баҕа санааларын олоххо киллэрбитэ.
Кэргэним, аҕабыт орто туруу дойдуга үлэлээн ааспытын араас грамоталар, хайҕал суруктар туоһулууллар. Олор истэригэр СӨ Ил Түмэнин, тыа хаһаайыстыбатын, ойуур хаһаайыстыбатын Департаменын, оройуон үгүс грамоталара бааллар.
Егор Петрович тарбаҕар талааннааҕа
Оҕолоругар, аймахтарыгар, нэһилиэгэр бэйэтэ оҥорбут бэлэҕэ элбэх. Төрөөбүт Чараҥын 80 сылыгар анаан кыбытык тигии көбүөр бэлэхтээбитэ. Олорбут, үлэлээбит Бэстээҕин иһигэр араас быыстапкаларга ситиһиилээхтик кыттааччы, маллаах иһиттэри, кыбытык тигиинэн, дэйбиирдэри оҥороро. Өссө да элбэх былааннардаах этэ даҕаны, ыарахан ыарыыттан олохтон бардаҕа…
Кэргэним, аҕабыт, эһээбит, хос эһээбит биһиэхэ үтүө өйдөбүлү хаалларда, олоҕун, үлэтин салгыыр ыччаттардаах. Бу орто дойдуга баарбыт тухары кини сырдык мөссүөнэ, ыраас суобаһа сүрэхпитигэр өрүү баар буолуоҕа.
Кэргэнэ, оҕолоро, күтүөтэ, кийииттэрэ, сиэннэрэ.