Федора ФОМИНА, А.С. Данилова аатынан Өктөмнөөҕү «Барҕарыы» култуура киинин дириэктэрэ:
— Ааспыт дьылбытыгар махтаныах эрэ тустаахпыт. Аммаҕа буолбут Олоҥхо ыһыаҕар биһиги нэһилиэктэн хаһааҥҥытааҕар да элбэх киһи кыттыбыта. Ол курдук, 5 киһи улууска турбут «Хаҥалас Боотур» олоҥхоҕо, ону таһынан тойукка, оһуокайга, норуот ырыаларыгар — элбэх киһи.
Нэһилиэк биир киэн туттар ыччата Иоганн Матвеев Дьокуускайга «Сэргэлээх уоттара» улахан уораҕайга айар кэнсиэрин оҥорон сүгүрүйэр дьонун түмтэ. Икки кэнсиэр тухары саала тобус толору буолан үөртэ!
Кэлэр сылы элбэх былааннаах көрсөбүт. Хомолтолооҕо диэн кулууппут дьиэтэ саахалланар туруктаах буолан сабылынна. Онон саҥа култуура киинэ тутулларын дьон-сэргэ олус кэтэһэр, эрэнэр.
Зинаида ЛАЗАРЕВА, Кыһыл Үрүйэттэн, үлэ бэтэрээнэ:
— Ааһан эрэр сылга Арааптар Холбоһуктаах Эмираттарын куораттарын, араас экзотическай арыыларынан, Аравийскай муоранан аарыма лайнерынан устуум, аатырар Дубай Абу Даби куораттарын илэ харахпынан көрүүм, күүлэйдээһиним умнуллубат түгэн буолар.
Оҕолорбор, сиэннэрбэр 70 сааспынан итинник чаҕылхай күннэри бэлэхтээбиттэригэр махтал!
Татьяна ПЕТРОВА — МОЙУУ КЫЫҺА, Покровскайдааҕы «Сардаана» оҕо сайдыытын киинин буҕаалтыра:
— Быйыл саха халаандаарын Айыыһыт сылыгар үбүлүөйдээх сылым ааһан эрэр. «Эрэкэ-дьэрэкэ оҕолорго» диэн оҕо кинигэ таҕыста. Төрөөбүт дойдубар ахтыы кинигэбинэн уонна хоһооннорбунан дойдум дьоно «Сайылыгым ийэлэрэ» дьүһүйүү уонна уруһуй быыстапкатын туруордулар.
Кэлэр сылга билигин айа сылдьар хас да үлэм түмүктэниэхтээх. Долгуйабын. Барыта табылларыгар эрэнэбин. Саҥа сылга барыгытыгар ыраас халлааны, чэгиэн туруу, эйэлээх олоҕу, дьолу-соргуну баҕарабын.
Людмила Аммосова.