СӨ Ийэ дойдуну көмүскээччи сыла

Быйыл Саха сиригэр Ийэ дойдуну көмүскээччи сыла биллэриллиннэ. Өктөм нэһилиэгин элбэх оҕолоох Максимовтар патриоттуу санаалаах ыал.

Аҕалара Павел Семенович Максимов «Боотур» этэрээт байыаһа, сулууспалаан кэлбитэ эрээри сотору кэминэн салгыы байыаннай дьайыыга барарга санаалаах сылдьар эр бэрдэ. Уоллара Түмэн Максимов 2021 сыллаахха Арассыыйа армиятыгар сулууспалаан баран, Приморьеҕа контракт баттаһан салгыы сылдьан баран, 2023 сыллаахха дойдутугар кэлбитэ. Билигин М.К. Аммосов аатынан ХИФУ историческай факультетыгар үөрэнэр.

Мария уонна Павел Максимовтар иккиэн Үөһээ Бүлүү улууһуттан төрүттээхтэр. Павел Семенович Өктөм нэһилиэгэр аймахтардаах буолан Дьокуускайдааҕы тыа хаһаайыстыбатын академиятын филиалыгар үөрэммит уонна Эркээни хочотун сөбүлээн 2011 сыллаахха дьиэ кэргэнин көһөрөн аҕаларга санаммыт.

Быйыл кэргэмминээн Мариялыын бииргэ олорбуппут 25 сылбыт буолла. Иккис уонна үһүс оҕолорбут Хаҥалас улууһугар күн сирин көрбүттэрэ. Оҕолорбутугар сахалыы ааттары иҥэрэбит диэн баҕа санаалаах этибит. Онон уолбут Түмэн, улахан кыыспыт Сайкуо уонна кырачааммыт Туналы диэн эриэккэс ааттаахтар. Мин ханна да буолларбын көмүстэрбин, оҕолорбун, уонна күндү кэргэммин куруутун саныы сылдьабын. Кинилэр олохторо нус-хас буоллун диэн Аҕа дойдуну көмүскээччилэр кэккэлэригэр киирбитим. Байыаннай дьайыыга барарга бэбиэскэ тутан баран резербэҕэ хаалбытым, онтон 2023 сыллаахха бэйэм баҕабынан «Боотур» этэрээт  байыаһа буолбутум.

Бастаан «Боотур» киинигэр ый курдук базаҕа олордон үөрэппиттэрэ. Оччолорго анал эрчиллэр полигон игин суоҕа. Онтон ол сыл муус устарыгар байыаннай дьайыыга барбытым уонна 6 ыйынан контракпын толорон кэлбитим. Билигин иккистээн барарга бэлэмнэнэ сылдьыбын.

Биһиги дьиэ кэргэн улахан судаарыстыбаннай көмөнүтутта иликпит. Ол да буоллар социальнай өттүттэн уоту-күөһү төлүүргэ, араас өҥөҕө чэпчэтиилэр бааллар. Быйыл Ил Дархаммыт Айсен Николаев 2025 сылы СӨ Ийэ дойдуну көмүскээччи сылынанбиллэрдэ. Бу барыта патриотическэй санааны өрө тутууга, сайыннарыыга төрүөт буолар, — диэн ыал аҕата Павел Семенович этэр.

Бигэ туруктаах, дьоллоох дьиэ кэргэн – таптал, үтүө санаа уонна кыһамньы биһигэ, модун уонна дьоллоох дойду тирэҕэ. Дьиэ кэргэҥҥит таптал уйата буолан ил-эйэ эрэ эҥэрдэстин, холумтаҥҥыт сылаас, олоххут баай-байылыат буоллун диэн Максимовтарга баҕа санаабытын тиэрдэбит.

Татьяна Владимирова