Саха народнай поэта, драматург, ССРС суруйааччыларын Сойууһун чилиэнэ Иван Михайлович Гоголев-Кындыл төрөөбүтэ 95 сылыгар анаммыт ахтыы тэрээһин Г. В. Ксенофонтов аатынан кыраайы үөрэтэр түмэлгэ тэрилиннэ.
Бу күн суруйааччы төрөөбүт улууһуттан Бүлүү куоратын П.Х. Староватов аатынан кыраайы үөрэтэр түмэлин дириэктэрэ Татьяна Афанасьева уонна Бүлүү улууһун Чочу нэһилиэгин И. М. Гоголев-Кындыл түмэлин салайааччыта Галина Алексеева ыалдьыттаатылар. Кинилэр ытык киһи аатын үйэтитиигэ биир дойдулаахтара туох үлэ тэрийэллэрин кэпсээтилэр.
Иван Гоголев дьиэ кэргэнинээн улууспут киинигэр Покровскайга Хоруол Тумуһугар дьиэлэнэн-уоттанан 40-н тахса сыл олорбута. Чуолаан, манна олорон кини бөдөҥ айымньыларын айан-тутан таһаарбыта биллэр. Көрсүһүүгэ Кындылы кытта алтыһан ааспыт норуодунай суруйааччы Павел Харитонов-Ойуку, аймахтарын аатыттан күтүөтэ Валерий Федоров бэрт истиҥ тылынан санаан-ахтан аастылар. Покровскай куорат баһылыга Петр Гермогенов, суруналыыс Раиса Парникова Иван Михайлович кэргэнэ, биллиилээх селекционер, Саха АССР, РФ үтүөлээх агронома Мария Черткова суруйааччы олоҕор дьоһун суолтатын бэлиэтээн тураннар бу икки биллиилээх дьоммут ааттарын үйэтитии салҕаныах тустааҕын, онно үлэ тэриллэригэр эттилэр.
Көрсүһүү туһунан сиһилии «Хаҥалас» хаһыат кэлэр нүөмэригэр ааҕыҥ.
Ольга Гермогенова.