Дьаам култууратын, үгэһин 5 сылынан

СӨ Ил Дархана Айсен Николаев былыһыын Саха сирин  Хаҥалас, Өлүөхүмэ, Ленскэй, Уус-Маайа улуустарыгар Дьаам култууратын, үгэстэрин сөргүтүүгэ, сайыннарыыга биэс сылы биллэрбитэ. Туохханнык үлэ ыытылынна, инникигэ торумнанна диэн “Потомки государевых ямщиков» өрөспүүбүлүкэтээҕи общественнай тэрилтэ   бөлөҕө салайааччы Ирина Стрекаловская көҕүлээһининэн  Кытыл Дьураҕа ыалдьыттаата.

Төгүрүк остуол тула олорон сүбэлэстилэр

Бу үтүө дьыаланы  тарҕатан Россия таһымыгар таһаарбыт Анатолий Добрянцев буолар. Кини төрөөбүт күнүгэр дойдутугар дьаһалта дьиэтигэр нэһилиэк баһылыгын Николай Осиповы, актыыбы кытары  түмсэн  ити Сыллар чэрчилэринэн  салгыы тугу үлэлиири сүбэлэстилэр.


Кытыл-дьуралар олохтоох  “Сайдыы” култуура дьиэтигэр бу олохтон эрдэ барбыт
бу чулуу биир дойдулаахтарын аатын иҥэрбиттэрэ, кини олоҕун, үлэтин билиһиннэрэр хаартыскалаах  стендэ оҥорбуттара. Үйэтитии үлэтэ салгыы барар. Баҕа санаа баһаам –   төрүччүлэринэн дьарыктаныахтара, кыалыннаҕына, матырыйаал  салгыы хомуйан нэһилиэктэрин историятыгар эбии кинигэ таһаарыахтара, Анатолий Добрянцевка бюст туруоруохтара о.д.а.

Ыалдьыттар сэргэх кэнсиэртээх кэллилэр

Анатолий Добрянцев баара буоллар бу күн 67 сааһын туолуо этэ. Кыһыҥҥы өрүс суолунан эрдэ туран Дьокуускайтан кэлбит ыалдьыттар «Потомки государевых ямщиков” общественнай тэрилтэ салайааччыта Ирина Стрекаловская, «Ямские бубенцы» ансаамбыл чилиэннэрэ, ХИФУ профессора,спорт энтузиаһа наука дуоктара Александр Ким-Кимэн, Покровскайтан улуустааҕы бэтэрээннэр сэбиэттэрин салайааччыта Данил Аргунов, олохтоохтор  олус истиҥник  Анатолий Анатольевич туһунан ахтан аһардылар, кини үйэлээх үлэтин сырдаттылар, бииргэ алтыһан, доҕордоһон ааспыт кэмнэрин санастылар. Бу киэһээ  ыалдьыттарбыт  кини таптыыр ырыаларын толордулар. Бу киэһэни  киин куораппытыттан “Ямские бубенцы», Үөдэйтэн  “Вечорка”, олохтоохтор “Журинка” фольклорнай ансаамбыллара дьаам дьонун урукку ырыаларын бэлэхтээтилэр.

Ону сэргэ ыалдьыттарбыт Өксөкүлээх Өлөксөй аатынан Норуоттар доҕордоһууларын дьиэтигэр үлэлээн эрэр саҥа “Голос дружбы» диэн Арт-этэрээт эдэркээн артыыстарын аҕалан билиһиннэрдилэр. Бу дьон үс омук тылынан күүстээх мааны куоластарынан ыллаан сөхтөрдүлэр. Елизавета  Глаголева, Татьяна Соросова-Балаганчик уонна Валерий Сергеев талаан  ыччакка  баарын көрдөрдүлэр. “Журинкалар” хормуоскаһыттара Сергей Петров тэтимнээх доҕуһуолунан Дьураттан төрүттээх, Үөдэйгэ олохсуйбут аҕыс уону туолаары сылдьар Тамара Кузьмина үөрбүччэ-көппүччэ дьаамсыктар  былыргы көрдөөх ырыаларын толорон барыбытын астыннарда.

“Играй, гармонь – живи частушка!” быйыл саас Табаҕаҕа күүтэр

Дьаам култууратын биэс сыла салҕанар. “Потомки государевых ямщиков” общественнай тэрилтэ салайааччыта Ирина Стрекаловская бу киэһээ олохтоохторго СӨ норуотун хаһаайыстыбатын үтүөлээх үлэһитэ, «Гордость нации-2020» бастакы  бүтүн Россиятааҕы общественнай бириэмийэни ылбыт улахан энтузиаст, общественнай-политическай диэйэтэл, СӨ Ил  Түмэнин бэрэссэдээтэлин солбуйааччытынан үлэлээбит, биллэр спортсмен, научнай үлэһит Анатолий Добрянцев саҕалаабыт дьыалата утумнааччылардаах буоларыгар, урукку көлүөнэ дьоммут үтүө үгэстэрэ көлүөнэттэн көлүөнэҕэ   бэриллэн иһэригэр, Ил Дархаммыт  биллэрбит Сылларын чэрчитинэн үгүс үйэлээх үлэ барарыгар  баҕа санаатын тириэртэ.


Кини
актыбыыстарга общество аатыттан наҕараадалары, ол иһигэр Иркутскай-Дьокуускай 126 ыстаансыйалардаах 2723 биэрэстэлээх почта суола арыллыбыта 280 сылынан үбүлүөйүнэй мэтээллэри туттарда. Кини бу тэрээһиҥҥэ кыттыбыт дьоҥҥо, ону сэргэ  “Потомки государевых ямщиков” общественнай тэрилтэ  айар бөлөҕө Анатолий Добрянцев төрөөбүт  дойдутугар кэлэ сылдьарыгар күүс-көмө буолбут СӨ Судаарыстыбаннай Мунньаҕар (Ил Түмэҥҥэ), Норуоттар доҕордоһууларын дьиэтин салалтатыгар махталын тириэртэ.

Мантан саас энтузиастары үгүс үлэ күүтэр. Быйылгы 23-с “Играй, гармонь живи, частушка!” өрөспүүбүлүкэтээҕи фестиваль Табаҕа сиригэр ыытыллар. “Көрсүһүөххэ диэри!” дии хааллылар дьуралар.

Людмила Аммосова. Ааптар хаартыскаҕа түһэриилэрэ.