Төрөөбүт тыл харыстабылыгар
И. А. Федоров аатынан III Малдьаҕар сүрүн уопсай оскуолатын алын сүһүөх учуутала Мария Ивановна Старостина салалтатынан оҕолор ааспыт сылтан сахалыы тылынан ойуулуктары оҥорон холоноллор эбит. Бу соторутааҕыта «Мин дойдум – олоҥхо дойдута» диэн номнуо иккис ойуулуктарын бэлэмнээн таһаардылар. Сонун дьарыктарын туһунан Мария Старостина кылгастык билиһиннэрдэ.
— Былырыын «Ийэ тыл этигэн кэрэтэ» улуустааҕы күрэх чэрчитинэн төрөөбүт тылбытыгар аналлаах ойуулук куонкуруһугар кыттыбыппыт. Онуоха анаан «Нэччэки сүүрүк» диэн Харыйалаахха олоро сылдьыбыт сүүрүк киһи туһунан номоҕунан бастакы ойуулукпутун оҥорбуппутуонна кыайыылаах буолан турабыт. Быйылгы ойуулук күрэҕэ олоҥхоҕо ананар, онон бу күннэргэ «Мин дойдум – олоҥхо дойдута» диэн ааттаах иккис ойуулукпутун таҥан таһаардыбыт.
Ойуулукпутун оҥорорбутугар аан бастаан ис хоһоонун суруйабын. Онтон оҕолору, төрөппүттэри кыттыһыннаран бииргэ уруһуйдуубут. Бэйэм эрдэ оҕону иитиигэ төрөппүттэри кытта үлэлэһиигэ анаммыт дакылааттардаах этим, онтуктарбын быраактыкаҕа туһанан бу сонун бырайыакпыт олоххо киирдэ. Оҕолор да, төрөппүттэр даманнык үлэҕэ олус сэргээн-сэҥээрэн, көхтөөхтүк кыттыһаллар. Видеоны таҥааһынынан бэйэм сөбүлээн дьарыктанабын, телефоҥҥа анал сыһыарыынан оҥорор улахан уустуга суох. Кыттыбыт оҕолор үөрэтэр-салайар 3-скылааһым үөрэнээччилэрэ — Аня Христофорова, Ринат Пудов, Майя Федотова уонна бэйэм оҕом, 4-с кылаас үөрэнээччитэ Сайаана Старостина. Оҕолор олус маладьыастар, тугу этэрбин, интонацияларын сонно тута ылынан ойуулукпут түргэнник оҥоһулунна. Түгэнинэн туһанан «Хаҥалас» хаһыат ааҕааччыларын Ийэ тыл күнүнэн истиҥник эҕэрдэлиибит. Саха буолан сандаарыҥ! Киһи буолан килбэйиҥ! – диэн Мария Ивановна эҕэрдэтин тиэртэ.
Бүгүн, Ийэ тыл күнүгэр оҕолор ойуулуктарын киэҥ араҥаҕа бастакытын таһаарабыт. Көрүҥ, сэргээҥ, айар дьоҕурдаах оҕолору биһирээҥ!
Видео: https://t.me/gazetahangalas/34823
Ольга Гермогенова.