Чэбдик олох
Хаалыктаах хаамыы хайдах саҕаламмытын сэгэтэн көрдөххө, Финляндия хайыһардьыттара сайыҥҥы кэмҥэ формаларын сүтэримээри аҥардас хайыһар торуоскатын тутаннар дьарыктарын салҕаабыттар. Салгыы 1990 сыллартан спорт биир көрүҥэ диэн бигэргэппиттэр эбит уонна Австрияҕа, Германияҕа хотугулуу хаамыы диэн ааттаммыт. Быраабылатын үөрэтэн сөпкө хаамтахха былчыҥнаргын сайыннарар, тыҥа, сүрэх үлэтин тупсарар, сис уҥуоҕа көнө буоларыгар туһалаах диэн дакаастаабыттар. Ыраас чэбдик салгыҥҥа хаамыы туһата элбэх буоллаҕа. Айылҕа уларыйыытын, күн тахсарын көрөр, тыа суугунун истэр, чычаах ырыата…. барыта кэрэ көстүү буоллаҕа.
«Күөрдэм сканди» бөлөҕө аҕыйах киһиттэн саҕалаан сыл аайы эбиллэн, билигин быһа холоон 25 киһи дьарык оҥостон, күн аайы кыһыҥҥы томороон тымныылартан, сайыҥҥы куйаас күннэртэн чаҕыйбакка, сарсыарда эрдэттэн хааман саҕалыыбыт. Сыл саҕаланыытыгар уопсай былаан оҥостобут, үгэскэ кубулуйбут элбэх тэрээһиннэрдээхпит. Ол курдук сыл аайы ахсынньы ыйга нэһилиэкпит дьонугар, оҕолоругар анаан хаар оҥоһуктары оҥорон үөрдэбит. Сөбүлээн сылдьар сирбитигэр харыйа киэргэтэн сылбытын түмүктүүбүт, кэлэр саҥа сылы үөрэ-көтө көрсөбүт. Остуоруйа геройдара мааска кэтэн оҕо сааспытын санаан оонньуубут, салаасканан сосуһан, сыыртан сырылаан мэниктээн да ылабыт.
Ааспыт 2024 сылга ферма үлэһиттэрин биир күн солбуйан үөрдэн турабыт. «Самыртай» түмэлгэ мустан Анал байыаннай дьайыыга сылдьар дьоҥҥо анаан анал чүмэчи оҥорон олохтоох дьаһалтаҕа туттарбыппыт, маскировочнай сиэккэ өрүүтүгэр туора турбатахпыт. Хаамарга көҕүлээн бэтэрээннэргэ хаалык торуоска бэлэхтиирбит эмиэ үгэскэ кубулуйда. Кулуупка тиийэн маскарааттаан миэстэлэһэн сертификат хаһаайыттара ааттаммыппыт. Онтон дьэ кэтэһиилээх сааспыт кэллэҕинэ ыам ыйыттан тимир көлө билисипиэттэрбитигэр олорон Самыртайбыт кэрэ миэстэлэригэр айанныахпыт турдаҕа.
«Күөрдэм сканди» бөлөххө эрдэттэн хаамыыннан, уу куттан саҕалыыбыт. Билигин сүүрүүннэн дьарыгырар Прокопьева Наталья Никифоровна элбэх ситиһиилэринэн барыбытын үөртэ. Ол курдук, Дьокуускай куоракка өрөспүүбүлүкэтээҕи XXII-с кыһыҥҥы сүүрүү (5 км) марафонугар бэйэтин саастыылаахтарын ортотугар үрдүк көрдөрүүнү ситиһэн, элбэх утарсааччыларын кэннигэр хаалларан бочуоттаах III-с миэстэни ылары ситистэ уонна Хаҥаласка ыытыллыбыт үбүлүөйдээх өрөспүүбүлүкэтээҕи турнирга эмиэ үһүс буолан Добун суругунан, мэтээллэринэнуонна сертификатынан бэлиэтэннэ.
Айылҕаҕа сылдьан киһи санаата сааһыланар, толкуйуҥ тобуллар, соруктаргын былаанныыгын уонна дьиэ түбүгүттэн быыс булан биир санаалаах дьүөгэлэргин көрсөн күлэ-үөрэ кэпсэтэн сынньанан кэлэҕин. Дьэ ити курдук «Күөрдэм сканди» ааттанан биһиги сэргэхтик олоробут.
Анастасия Соловьева.
Күөрдэм сэл.
Хаартыскалар “Күөрдэм сканди” түмсүү архыыбыттан.