Тэрилтэлэргэ
«Сахатранснефтегаз» АУо Хаҥаластааҕы учаастагын гааһытарҕатар ситимнэрин начаалынньыгын кытта Дмитрий Муксунову көрүстүм. Кини Владивосток куоракка 2015 сыллаахха Уһук Илиҥҥи Федеральнай университекка «Теплогазоснабжение уонна вентиляция» диэн идэҕэ үөрэнэн кэлэн Покровскай куоракка бастаан силиэсэринэн үлэтин саҕалаабыт. Икки сыл силиэсэринэн, онтон учаастак маастарынан ананан үлэлээн баран билигин, номнуо төрдүс сылын, начаалынньыгынан үлэлии сылдьар.
— Тэрилтэҕэр хас үлэһиттээххин, төһө дьиэни-уоту күөх төлөнүнэн хааччыйаҕыт?
— Бүгүҥҥү күн «Сахатранснефтегаз» АУо Хаҥаластааҕы учаастагар 100 испэсэлиис үлэлиир. Кинилэр 511 км усталаах гаас утаҕын, 9 нэһилиэнньэлээх пууҥҥа (Покровскайга, Мохсоҕоллооххо, Үөһээ Бэстээххэ, Булгунньахтаахха, Улахан Ааҥҥа, Төхтүргэ, Өктөмҥө, Уулаах Ааҥҥа уонна Нөмүгүгэ), ол иһигэр 51 гааһытарҕатар пууннары, ОДьХХ уонна “Хаҥаластааҕы газстрой” АУо хочуолунайдарын, 9 346 дьон олорор дьиэлэрин, ол иһигэр элбэх кыбартыыралаах дьиэлэри көрөбүт-истэбит.
— Нэһилиэнньэни социальнай гаастааһын үлэтэ хайдах баран иһэрий?
— Россия президенэ Владимир Путин 2021 сыл муус устарыйынааҕы сорудаҕынан «Нэһилиэнньэни социальнай гаастааһын» тосхолугар олоҕуран Ил Дархан Айсен Николаев Ыйааҕынан эрэгийиэннээҕи гаастааһын операторынан «Сахатранснефтегаз» АУо анаммыта. Ол кэмтэн ыла үлэ тохтообокко барар. Хаҥалас улууһугарсоциальнай гаастааһын бырагырааматынан үлэ тэтимнээхтик ыытыллар. Быйылгы сылга, билиҥҥи туругунан, 39 сайаапка киирэн турар. От ыйыгар диэри эбии сайаапкалары хомуйабыт, онтон холбуур үлэлэри сыл түмүгэр дылы ыытыахпыт. 2024 сылга 61 дьиэни холбуур былааннаах этибит, ол былааммытын аһара толорон 101 дьиэни күөх төлөҥҥө холбообуппут.
— Бу соторутааҕыта СӨ Бырабыыталыстыбатын 2024 сыллааҕы үлэтин отчуота буолан ааспыта. Манна нэһилиэнньэ долгуйар ыйытыгынан гаас хочуолларын тиэхиньиичэскэй көрүүтүн-истиитин сыаната ыараханын туоһуласпыттара.
— Дьон гаас үлэһиттэрэ биирдэ кэлэн бардахтарына ыарахан сыананы төлүүбүт диэн сыыһа өйдүүрэ баар суол. Дьиҥэр,саахал тахсар түгэнигэр ону туоратыыга үлэни тэрийии бу тиэхиньиичэскэй көрүү-истии сыанатыгар эмиэ киирсэр. Холобура, саахал тахсан дьиэлэрэ тоҥоору гыннаҕына, хочуол умуллан үлэлээбэт түгэнигэр дьиэлээх дьон тута биһиэхэ телефонунан биллэрэллэр. Биһиги сулууспабыт хайаан да тиийэн хочуолу чөлүгэр түһэрэр, барытын өрөмүөннүүр. Ити өҥө дуогабарга киирэ сылдьарын быһыытынан өҥөнү туһанааччыларбыт эбии төлөөбөттөр.
— Кэлэктиипкитигэр Анал байыаннай дьайыыга сылдьар дьоннооххут дуо? Кинилэргэ туох көмөнү оҥороҕут?
— Биһиги тэрилтэбититтэн Анал байыаннай дьайыыга иккикиһи кытта сылдьар. Бу дьоммутугар тэрилтэбит үлэһиттэрэ бары харчы хомуйан көмөлөһөбүт. Анал байыаннай дьайыыга сылдьар дьонноох ыалларга СӨ Бырамыысалыннас уонна геология министиэристибэтин былаанын таһынан социальнай гаастааһын бырагырааматынан бастакы уочарат гаас ситимин тарданкиллэрэбит. Алексей Колодезников генеральнай дириэктэрдээх үрдүкү тэрилтэбит «Сахатранснефтегаз» АУо10-ча массыынаны, дроннары ону таһынан экипировка таҥас-сап о.д.а туох наадалааҕынан көмө оҥоро тураллар.
Түмүккэ, салайааччы дьон-сэргэ хаһан, ханнык кэмҥэ табыгастааҕынан тиэхиньиичэскэй көрүүнү оҥортороллоро хайаан да наада. Ол инниттэн эрдэттэн телефонунан кэпсэтэн болдьоһоллоро ирдэнэр, биһиги анал былаанынан үлэлиибит диэн эбэн эттэ.
Уйбаан УЙГУУРАП,
хаартыскаларга: «Сахатранснефтегаз» АУо Хаҥаластааҕы учаастагын гааһы тарҕатар ситимнэрин начаалынньыга Дмитрий Муксунов.
Покровскай к. учаастагын маастара Александр Слепцов уонна силиэсэр Александр Болотов үлэлэрин кэмигэр.