Кыайыы 80 сылыгар
Тарбаҕар талааннаах, ураты дьоҕурдаах далбар хотун үлэ бэтэрээнэ, Арассыыйа худуоһунньуктарын сойууһунчилиэнэ, Хаҥалас улууһун 2-Малдьаҕар нэһилиэгин бочуоттаах олохтооҕо, Саха Өрөспүүбүлүкэтин уус уран оҥоһуктарын маастара Хаҥалас улууһун норуотун маастара Светлана Павлова “ Сүрэҕим баҕата, дууһам иэйиитэ” айар үлэтин киэҥ эйгэҕэ таһаарар быыстапката Дьокуускайга буолан ааста.
Өбүгэлэрбит үгүс үйэлэри туораан илдьэ кэлбит норуот уус-уран оҥоһуктарын харыстаан илдьэ сылдьар, кэрэ эйгэни төрүттүүр, үтүө эйгэни үйэтитэр, айар-тутар дьоҕурдаах Светлана Петровна 1950 сыллаахха сэтинньи 21 күнүгэр Улахан Аан нэһилиэгэр Орджоникидзевскай оройуоҥҥа элбэх оҕолоох ыалга төрөөбүтэ. Аҕата Тапыев Петр Дмитриевич – чемпион –тракторист, ийэтэ Вера Иннокентьевна – Кыһыл Знамя уордьанын кавалера.
1974 сыллаахха Красноярскай кыраай Минусинск куоратыгар Тыа хаһаайыстыбатын техникумугар киирэн ситиһиилээхтик үөрэнэн бүтэрбитэ. Доруобуйатынан кыаллыбакка талан ылбыт идэтинэн үлэлээбэтэҕэ. Улахан-Аан уһуйааныгар кырачаан оҕолору олоххо такайан 43 сыл үлэлээбитэ.
Кэргэнэ СӨ үөрэҕириитин туйгуна, СӨ үөрэхтээһинин бочуоттаах бэтэрээнэ Валентин Васильевич оҕону төрүт өбүгэ үлэтигэр уһуйбут, спорт араас көрүҥнэригэр дьарыктаабыт, Улахан-Аан оҕолорун сахалыы иитиигэ сүрүн болҕомтотун ууран үөрэппит, өр кэмҥэ физкултуура, начаалынай байыаннай бэлэмнэнии уонна история учууталынан үлэлээбит чаҕылхай олоҕу олорон ааспыт үтүөкэннээх киһи.
Светлана Петровна кэргэнинээн Валентин Васильевичтыын 3 оҕону төрөтөн, атахтарыгар туруортаан, үөрэхтээх дьон оҥортоон улаатыннартаабыттара. Иһирэх ийэ, амарах эбээ киһи -туохха да тэҥҥэммэт кэрэ өйдөбүлүн дьоҥҥо-сэргэҕэ тиэрдэр. Айылҕаттан бэриллибит, ис сүрэхтэн тахсар кэрэ уобараһы киэҥ эйгэҕэ таһаарар, дэгиттэр, илиитигэр талааннаах маастар дириҥ иэйиитин иҥэринэн иис ураты эйгэтигэр тиһэн 80 кылтан-сиэлтэн паннолары, сэлээппэлэри, тирииттэн бэргэһэлэри, биисэртэн киэргэллэри, сахалыы таҥастары Улуу Кыайыы 80 сылыгар анаан дьон-сэргэ болҕомтотугар таһаарда.
Үөрүүлээх тэрээһиҥҥэ Хаҥалас улууһун аҕа баһылыгын эбээһинэһин толорооччу Василий Андреев, 2-Мальдьаҕар нэһилиэгин аҕа баһылыга Александр Алексеев, Саха Өрөспүүбүлүкэтин үтүөлээх үлэһитигэ, СӨ норуотун ускуустубатын, уус—уран оҥоһуктарын харыстыыр, сайыннарар, тэнитэр “Симэх” Национальнай Киин дириэктэрэ Яна Игнатьева, М.Е. Васильева аатынан 2-Малдьаҕар орто оскуолатын учуутала, Наталья Семеновна Григорьева, 2 Малдьаҕар нэһилиэгин дьахталлар сэбиэттэрин ааттарыттан, үөрэҕирии киинин салайааччыта Татьяна Лукина, Хаҥалас улууһун «Арчы дьиэтэ» норуот айымньытын киинин директора Лидия Харитонова, “Көмүлүөк” түмсүү кыттыылаахтара, биир дойдулаахтара эҕэрдэ тылларын эттилэр.
Светлана Павлова биир дойдулааҕа «Айархаан» этногруппа солистката, Аан дойду чулуу хомусчута, Саха Өрөспүүбүлүкэтин култууратын туйгуна Нарыйаана Ренанто, Светлана Петровна кэргэнин Валентин Васильевич эдэр сааһыгар бииргэ алтыһан үөрэммит доҕоро Саха Өрөспүүбүлүкэтин норуодунай артыыһа Владимир Татаринов, СӨ култууратын үтүөлээх артыыһа Тамара Попова дьоро киэһээни ылбаҕай ырыаларынан-тойуктарына киэргэттилэр.
Светлана Петровна өссө да билиҥҥи тэтимҥин ыһыктыбакка, оҕолоруҥ, сиэннэриҥ тапталларыгар угуттанан айа-тута сылдьарыгар баҕарабыт. Үгүс үөрүүлээх күннэн, уһун уруйдаах олохтон, самныбат саргылан диэн алгыс тылбытын этэбит.
Наталия Федорова, Хаҥалас улууһун «Арчы дьиэтэ» норуот айымньытын киинин методиһа.