1-кы Малдьаҕар нэһилиэгэр Аҕа дойдуну көмүскээччилэр күннэригэр Анал байыаннай дьайыыга кытта сылдьан олохторун толук уурбут буойуннар Алексей Семенов, Иван Давыдов уонна билигин сулууспалыы сылдьар биир дойдулаах уолаттарбыт дьиэ кэргэннэрэ бириис туруораннар сонун күрэхтэһии бэрт сэргэхтик ааста. Ол курдук, 3 көрүҥҥэ — дартска, корнхоллга уонна оҕунан ытыыга бэрт тыҥааһыннаахтык 28 эр бэрдэ күрэхтэстэ.
Күрэх сүрүн тэрийээччилэринэн олохтоох общественник Егор Никифоров, 1-кы Малдьаҕар нэһилиэгин баһылыга Айталина Васильева буоллулар. Нэһилиэк эр дьоно сарсыардаттан мустан, ситиһиилээхтик күрэхтэһэн, хас көрүҥ аайы кыайыылаахтар быһаарыллан сыаналаах бирииһинэн, грамотанан, мэтээлинэн наҕараадаланнылар.
Дартска Антон Аркадьев бастаан Александр Адамов дьиэ кэргэнин бирииһин тутта, иккис миэстэ Николай Константинов буолла (бирииһи Максим Еремеев дьиэ кэргэнэ туруорда) уонна үһүс миэстэни ситиспит Олег Павловка бирииһи Виталий Лыткин туттарда. Корнхоллга Артур Васильев иннин кимиэхэ да биэрбэтэ (бирииһи Алексей Семенов дьиэ кэргэнэ туруорда), 2-с миэстэни Виктор Егоров ситистэ уонна Александр Романов аатыттан бирииһинэн наҕараадаланна, 3-с миэстэ Дмитрий Лаврентьев буолла, Иван Давыдов дьиэ кэргэнин бирииһин тутан үөрдэ. Оҕунан ытыыга күрэх эмиэ бэрт сэргэхтикааста. Манна Николай Егоров кыайыылаах ааттанна (Эдуард Сафронов дьиэ кэргэнэ бириис туруорда), иккис – Анатолий Михайлов (Алексей Емельянов дьиэ кэргэнэ бириис олохтоото), үһүс кыайыылаах Гаврил Варфоломеев буолан Николай Юрьев дьиэ кэргэнин бирииһинэн наҕараадаланна.
Сонун күрэхтэһииттэн бары даҕаны үөрэн-көтөн тарҕастыбыт. Инникитин маннык тэрээһиннэр өссө да ыытылла турдуннар.
Дмитрий Лаврентьев, Булгунньахтаах с.