«Аҕа дойду Улуу сэриитигэр олохторун толук уурбут буойуттарбытын үйэтитии биһиги ытык иэспит. Кэлин сылларга ирдиир, чинчийэр үлэ сорунуулаахтык тэриллэн Саха сириттэн 2263 сураҕа суох сүппүттэр ааттара билиннэ. Испииһэги мин бүгүн «Россия – моя история» историческай пааркатыгар туттардым. Бу историко-патриотическай бырайыак чэрчитинэн Смоленскай, Псковскай, Калужскай уонна Новгородскай уобаластарыгар буойуттарбытыгар пааматынньыктар туруоруллан ааттара суруллуоҕа. Ону сэргэ Мамаев Булгунньаҕар Сталинград кыргыһыытыгар сырдык тыыннара быстыбыт биир дойдулаахтарбытыгар өйдөбүнньүк-бэлиэ туруоруллуоҕа», — диэтэ Ил Дархаммыт Айсен Николаев бэйэтин телеграм-ханаалыгар.
Бу өйдөбүнньүктэр Саха сиригэр үлэлиир тэрилтэлэр, араас пуондалар уонна олохтоохтор түмпүт үптэригэр тутуллуохтара. «Улуус-медиа» социальнай ситимҥэ бу акция «Саха Бэчээт», биһиги үрдүкү салалтабыт, кыттыытынан өрөспүүбүлүкэбит сонуннары киэҥник тарҕатар средстволар көмөлөрүнэн сырдатыллан киэҥ далааһыннаныа диэн эрэллээхпит.
Испииһэккэ киирбит саллааттар ортолоругар 104 Хаҥалас дьоно баалларын туспа түмэн биһиги хаһыаппыт редакцията дьоммут-сэргэбит көмөтүнэн ситэри чуолкайдаан, чугас аймахтарын булан ити оҥоһуллар өйдөбүнньүктэргэ дьоһун ааттарын кыһыл көмүс буукубанан суруттарарга кыттыһабыт. Үлэни саҕалаатыбыт. Испииһэккэ киирбит буойуттарбыт сиэннэрэ, хос сиэннэрэ бэйэлэрин санааларын этэн эрэллэр. Холобур, биир Шиловаймахтартан 16 киһи бу уоттаах сэриигэ кыттыбыта билиннэ (испииһэккэ Смоленскай уобаластан Шилов Петр Степанович ыйылла сылдьар). Ол эрээри чугас дьонун олоҕун чинчийбит сиэн Александр Шилов чуолкайдаабытынан Петр Шилов Украина сиригэр сырдык тыына быстан көмүллүбүтэ билиннэ ( бу туһунан мин кэлин сиһилии суруйуоҕум). Онон испииһэккэ киирбиттэри чуолкайдааһын ирдэнэр. Үөдэй «Истоки» бибилэтиэкэ-түмэлиттэн кыраайы үөрэтээччи Галина Макарова Смоленскайтан булуллубут Филиппов Алексей Алексеевич, Калужская уобаластан Филиппов Спиридон Алексеевич (Ой Мураан, ааттара билиннэ). Ирдиир-чинчийэр этэрээттэргэ, ол иһигэр Саха сириттэн сылдьар чинчийээччилэргэ, махтаныах эрэ тустаахпыт.
Нэһилиэктэргэ киирбит буойуттарбыт үтүө ааттара тиллиэхтээх! Испииһэк улаханынан бу сигэнэн киирэн билсиҥ уонна тэҥэ суох кыргыһыыга дойдубут туһугар олохторун биэрбит дьоммут туһунан тугу билэргитин редакцияҕа суруйан биллэрэргитигэр көрдөһөбүт. Кыайыыны уһансыбыттарбыт тустарынан тэттик суруйуулары күүтэбит. Электроннай аадырыспыт: gaz_han@mail.ru
Список погибших в Псковской области
Список погибших в Калужской области
Список погибших в Смоленской области
Людмила Аммосова.