«Кыттыахпыт, Хаҥаласпыт аатын ааттатыахпыт…» дэһэллэр айар талааннаахтарбыт

Маастардар күннэрин көрсө

Маастардар күннэрин көрсө уустарбыт тугу дьаһана сылдьалларын кылгастык кэпсии түһэллэригэр көрдөстүм.

Анисия Фадеева, СӨ норуотун маастара:

— Кулун тутар 4-гэр Дьокуускайга өбүгүлэрбититтэн кэлбит таҥастарбытын кэтэн бырааһынньыктааҕы күргүөмүнэн хаамыыга дефиле-устуудьуйаны кытары кыттаары сылдьабыт. Күтүөппэр сахалыы сону тиктим…

Виктория Ноговицына, СӨ, Хаҥалас улууһун, Нөмүгү нэһилиэгин уус-уран оҥоһуктарын маастара:

— Кулун тутар 6-гар күнүс 2 чаастан маастар-дьүөгэбинээн Валерияна Никифоровалыын СӨ Национальнай бибилэтиэкэтин историческай салаатыгар «Саха мааны таҥаһа» диэн сандал саас мааны түһүлгэтигэр кыттабыт. Бу күн Светлана Петрова-Уран Хатыҥ, Зинаида Заболоцкая-Синан, Надежда Ахматова кинигэлэрэ сүрэхтэнэллэр. Кинигэ быыстапката уонна атыыта, саха таҥаһын көрдөрүү, кучу чэйдээх иһирэх кэпсэтии, оонньуулар буолуохтара. Москваттан ыҥырыылаах ыалдьыттар кэлиэхтэрэ – модельердар Мария уонна Полина Розенблюм, Хаҥаластан Валерияна Никифорова, мин, Дьокуускайтан Варвара Егорова-Дыгыйа уонна Варвара Попова. Тэрээһиҥҥэ сахалыы таҥастаах кэлии биһирэнэр. Ураты көстүүлээх, уран оҥоһуулаах сахалыы таҥастаахтары сэмэй бэлэх күүтэр. Ким баҕарар сылдьар.

Мин историческай таҥаһы тиктим, онтум Ярославскай аатынан түмэлгэ 3 чыыһылаттан быыстапкаҕа муус устар ыйга дылы туруохтаах. «Якутия мастеровая» быыстапкаҕа халадаайдаах хаһыаччык уонна эр киһи камзолун биэрэбин. Онон түбүктээх бырааһынньык күүтэр.

Валерина Никифорова, Нөмүгүттэн Хаҥалас улууһун маастара:

— Быйылгы быыстапкаҕа мин дьахтар бууктаах сонунан кыттабын. Бу сону икки өттүттэн кэтиэххэ син – буобура истээх, көхсүгэр хотойдоох. Научнай салайааччыбыт маастар Светлана Петрова. Дания түмэлигэр баар сону сөргүтэн тиктим. Бэргэһэтин чопчуурун японскай оҕуруонан тистим, бэрчээккэтин сарыыттан. Бэйэм да астынным.

Федора Фомина, Өктөмнөөҕү култуура дьиэтин дириэктэрэ, СӨ култууратын туйгуна:

— Биһиги, өктөмнөр, Маастардар күннэригэр кыттабыт. Дьокуускайга сэлэлээн хаамыыга барыахпыт, икки эдэр дьиэ кэргэттэри кытары. Дьоммут быыстапкаларга кыттыахтара — Светлана Баишева кылтан, Демьян Колодезников мастан о.д.а. оҥоһуктарынан.

Дарья Константинова, Кыһыл Үрүйэттэн СӨ норуотун маастара:

— Хайаан да кыттааччыбыт. Евдокия Антипиналыын ат симэҕэр кэмпилиэкпитин ситэрэн «Якутия мастеровая» быыстапкаҕа кыттыахпыт уонна сэлэлээн хаамыыга эмиэ сылдьыахпыт, улууспут чиэһин көмүскүөхпүт. Быйыл, иһиттэххэ, элбэх уран тарбахтаах, саха төрүт таҥаһын сэргээччилэрбит тэрээһиннэргэ кыттар санаалаахтарын истэн үөрэбит. Кырдьык даҕаны, саха сатаабатаҕа суох. Кэлэн иһэр бырааһынньыктарынан!

Ити курдук, улууспут дьоно тэрээһиннэргэ кыттарга былааннаналлар.

Людмила Аммосова.