Сэрии маҥнайгы ыйдарыттан улууспут оччотооҕу хаһыата Совинформбюро сарсыардааҥҥы, киэһээҥҥи иһитиннэриилэрин, дойдуга, өрөспүүбүлүкэҕэ туох соруктар туралларын бэчээттиирэ. Нэһилиэктэртэн эр дьон, туруу үлэһиттэр бастыҥнара фроҥҥа ыҥырыллан хаһаайыстыбалары тутан олорорго, кыстыкка киириигэ бэлэмнэниигэ төһө даҕаны уустуктар баалларын үрдүнэн, хаҥаластар биир санаанан кыайыы туһугар диэн бириэмэни аахсыбакка сыралаһалларын оройуон хаһыата сырдатара. Салгыы билсиэҕиҥ.
Кыргыттар уустук массыынанан үлэлииллэр
Сата. Началынай кылаастарга учууталлыыр Мария Васильевна Максимова уонна Елизавета Алексеевна Абрамова бэйэлэрин колхозтарын умнубаттар, сайыҥҥы сынньалаҥнарын кэмигэр үлэлии барбыттара.
Бу кыргыттар аҕыйах хоноот уустук массыынанан үлэлиири баһылааннар бурдук быһар массыынаҕа олорбуттара. Атырдьах ыйын 6 күнүттэн ыла 5 сменэ устатыгар Елизавета Абрамова 12,3 гектар, Мария Максимова – 11,5 гектар сиргэ бурдугу быстардылар.
С.Трифонов.
Бүгүн эн фроҥҥа туох көмөнү оҥордуҥ?
Филиппов, Павлов, кирпииччэ заводун буор хаһааччылара:
— Сталин үлэнэн тыылы бөҕөргөтүүгэ, Кыһыл Армия фашизманы үлтүрүтэригэр көмөлөһөргө норуотуыҥырбыта. Биһиги 4 киһи үлэлиир үлэтин икки буолантолордубут.
Давыдова, Эргис нэһилиэгин Сталин аатынан колхоз ынах ыаччыта:
— От ыйын 1 күнүттэн ыла 20 күнүгэр диэри 10 ынахтан 600 литра үүтү ыан ыларым оннугар 667 литра үүтү ыллым…
«Победа” артыал саппакы оҥорооччута:
— 6 паара оннугар мин 8 күн үлэлээн 6,5 паара саппакы оҥордум…
Телепия.
08.08.1941 с.
800 кг алтан туттарылынна
Өктөм сельпотугар колхозтаахтар араас эргэ алтан сэптэри-сэбиргэллэри аҕалан туттараллар. Сельпоҕа 800 килограмм алтан киирдэ.
Г.Романов.
21.08. 1941 с.
Бурдук хомуура бүттэ
III-Малдьаҕар. Ворошилов аатынан колхоз бурдук хомууругар атырдьах ыйын 14 күнүгэр турбута уонна 193 гектар ыһыытын хомуйан ити ый 28 күнүгэр 100 % бүтэрдэ.
Колхоз 101 гектар сир бурдугун кылааттаан күрүөлээтэ. 12үөрэнээччи өрүү тохтубут куолаһы хомуйууга үлэлээннэр 5 центнер бурдугу хомуйдулар. Бурдук хомууругар Наумов, Артамонов, Данилова, Ефремова, Федорова кыайыылаах үлэлэри көрдөрдүлэр.
Кононов, Анисимова.
30.08.1641 с.
Суруйуулары хаһыаттан бэлэмнээтэ Людмила Мордовская.