Өктөм нэһилиэгэр Аан дойдутааҕы дьахталлар күннэригэр анаммыт «Талба талаан киэһэтэ» диэн норуот маастардарын кытта көрсүһүү-биэчэр бастакы Президент М.Е. Николаев архыып-бибилэтиэкэтигэр буолан ааста.
Бу киэһэ нэһилиэк дьоно-сэргэтэ Өктөмтөн төрүттээх норуот маастардара Татьяна Шишигина, Анисия Фадеева, Покровскайтан “Надежда” дефиле-студия кыттааччылара (салайааччы Надежда Алексеева), Дьокуускайтан Саха Өрөспүүбүлүкэтин үтүөлээх учуутала Татьяна Стрекаловская, хоһоонньут Альбина Аммосова-Күндээдинскэйэ уонна нэһилиэкпит талба талааннаах хотуттара Анна Федорова, Надежда Максимова быыстапкаларын кэрэхсии, сэҥээрэ көрдүлэр. Талааннаах дьоммут айбыт, тикпит таҥастарын, киэргэллэрин «Надежда» дефиле-студия кыттааччылара имигэстик хамсанан, киһи эрэ кэрэхсиэх курдук хааман-сиимэн көрдөрбүттэрэ дохсун ытыс тыаһынан доҕуһуолланна.
Нэһилиэк эдэр хоһуун уолаттара бу киэһэҕэ кэлбит Далбар хотуттары ылбаҕай ырыаларынан эҕэрдэлээн, сибэкки дьөрбөтүн туттарбыттара олус долгутуулаах буолла.
Мустубут дьон маастардар кэпсээннэрин истэн, оҥоһуктарын көрөн олус үөрдүлэр, сэҥээрдилэр. Биир дойдулаахтарбыт Татьяна Николаевна уонна Анисия Кузьминична өссө да кэлэ сылдьыах буоллулар, араас маастар-кылаастары ыытарга бэлэмнэрин эттилэр. Бу курдук аттыбытыгар сэргэх, араас талааннаах кэрэ аҥаардар баалларын бары да астына көрдүбүт. Ыалдьыттарбытыгар махтанан туран сибэкки дьөрбөтүн уонна сэмэй бэлэхпитин туттардыбыт. Биэчэр Руслан Игнатьев уонна Алексей Фомин ырыаларыгар уопсай үҥкүүнэн түмүктэннэ.
Талаан, кэрэ көстүү хас биирдии киһи дууһатыгар киирэн үрдүккэ, кэрэҕэ угуйа туруохтун!
Федора Фомина, «Барҕарыы» КК дириэктэрэ, Өктөм с.