«Советтар знамялара» хаһыаппыт суруйара
Орджоникидзе аатынан колхозка
Миитиҥҥэ сылдьыбыт 29 колхозтаахтар Кыһыл Армияҕа итии таҥаһы ыытары толору сөбүлээн туран бары таҥас биэрэргэ суруллубуттара.
Сарсыныгар колхоз председателэ т.Кириллин С.А. хаатыҥканы, телогрейка сону, В. Припузов 1 бэргэһэни комиссияҕа аҕалан туттарбыттара. Таҥаһы аҕалан туттаран барыы салҕанар.
Итии таҥаһынан хааччыйаллар
Хачыкаат нэһилиэгинээҕи «III Интернационал» колхоз колхозтаахтара Кыһыл Армия байыастарын итии таҥаһынан хааччыйыыга кытталлар.
Ол курдук колхозтаахтар 49 устуука араас суол итии таҥастары, ити иһигэр 31 паара үтүлүгү, 22 бэргэһэни, 1 тулуубу у.д.а. биэрдилэр.
Инн. Никифоров.
1941 сыл. 28.09.
Бултка таҕыста
III Малдьаҕар нэһилиэгин Чкалов аатынан колхоз булчута Герасим Кузьмич Белых быйыл сайын хонууга үүнүүнү алдьатар үөннэри (күтэри) бултаабыта. Кини сайын устатыгар 2344 устуука күтэри өлөрөн сельпоҕа туттарда.
Белых кыһыҥҥы бултуур сэбин-сэбиргэлин оҥостубута ыраатта. Кини билигин кыһыҥҥы түүлээх бултааһыныгар ыраах тыаҕа таҕыста.
С. Кононов.
1941 сыл. 12.10.
Обороннай үөрэх саҕаланна
VI Малдьаҕар. Киров аатынан колхоз колхозтаахтара обороннай кружоктарга үөрэнэллэр.
Ол курдук ПВХО кружоктарыгар 15 киһи хабыллан 5 төгүл занятиены ыыттылар. Билигин обороннай кружоктар колхозтаахтар ортолоругар киэҥник тэнитиллэн ыытыллан эрэллэр.
И. Лотов.
1941 сыл. 19.10.
Кыһыл Армияҕа элбэх таанканы
Сэтинньи ый 23 күнүгэр Лена өрүс пароходствотын үлэһиттэрэ народтар Улуу сирдьиттэрэ табаарыс Сталин Ыҥырыытыгар эппиэттээн Саха республикатын бары үлэһиттэригэр Ыҥырыы оҥордулар.
…Бу Ыҥырыыны биһиги оройуоммут бары рабочайдара, сулууспалаахтара уонна колхозтаахтара сүҥкэн өрө көтөҕүллүүнэн көрүстүлэр.
«Победа” артыал үлэһиттэрэ 3-4-5 күннээх хамнастарын суруттаран танковай колонна оҥоһуутугар 1500 солкуобай, райсовет коллектива 2364 солкуобай харчыны биэрэттээтилэр. Соҕотох биир – сэтинньи 24 күнүн устатыгар оройуон үрдүнэн танковай колонна оҥоһуутугар15063 солкуобай 84 харчы киирдэ.
А. Решетников.
1941 сыл. 27.11.
Сорудах тоҕо туолбатый?
Үлэһиттэр депутаттарын оройуоннааҕы Советын исполкома 1941-1942 сылларга Аллах-Юнҥа таһаҕас таһыытыгар биһиги оройуонтан 1500 көлөнү ыытарга былааны бигэргэтэн турар, Якутзолототранс агенствотын сэбиэдиссэйин таб. Голоковы колхозтарынан көлө контрактациятын алтынньы 20 күнүгэр диэри ыытан бүтэрэргэ уонна көлөнү сэтинньи 15 күнүгэр диэри бүтүннүүтүн суолга туруорарга сорудахтаабыта.
Бу сорудах билигин ырааҕынан туола илик…Аллах Юнҥа баара суоҕа 922 көлө ыытылынна. …Якутзолототранс агенствотын үлэһиттэрэ, маҥнайгы уочарат таб.Голоков, колхозтары кытта көлө контрактракциятыгар дуогабар түһэрсибитинэн эрэ уоскуйан, көлөнү бириэмэтигэр ыытарга туох да үлэни ыыппакка олороллор. Оннооҕор саамай ыкса сытар “Кыһыл томтор» колхоз 4 көлөнү билиҥҥэ диэри тэрийэн ыыта илик. Райсовет ылыммыт решениета баччааҥҥа диэри тоҕо туолбатын Голоковтан ыйытара наадалаах.
И.М.
1941 сыл. 07.12.
Саҥа дьыллаах бэлэхтэр
Покровскайдааҕы детясли үлэһиттэрэ Москва аттыларыгар баар немецкэй сэриилэр кыаттарыыларын туһунан Советскай информационнай бюро иһитиннэриитин сүҥкэн үөрүүнэн иһиттилэр.
Коллектив членнэрэ Москва аттыгар баар Кыһыл Армия туйгуннаах байыастарын саҥа бөдөҥ кыайыыларынан эҕэрдэлээн туран, 200 солкуобай суумалаах саҥа дьыллааҕы бэлэхтэри ыытарга уураах ылыннылар. Бэлэхтэри ыытыыга М.Пудова 25 солкуобай харчыны уонна биир бэргэһэни,М.Матвеева 20 солкуобайы кытта биир бэргэһэни биэрдэ. “Кыһыл Армиябыт өстөөҕү хаһан тиһэҕэр тиийэ үлтүрүтүөр диэри, биһиги киниэхэ көмөбүтүн мөлтөтүөхпүт суоҕа» диэн суруйдулар.
К. Прохорова.
1941 сыл. 21.12.