Бэтэрээннэр сэбиэттэригэр
Хаҥалас улууһун дьаһалтатыгар баһылык эбээһинэһин толорооччу Василий Андреев кыттыылаах бэтэрээннэр сэбиэттэрин сүбэ-мунньаҕа буолла. Манна нэһилиэктэртэн 22 бэтэрээннэр сүбэлэрин бэрэстэбиитэллэрэ кытыннылар. Кэпсэтии ыччаты патриотическай тыыҥҥа иитии уонна Улуу Кыайыы бырааһынньыгын көрсүү тула барда.
— Хаҥалас улууһун бэтэрээннэрин сэбиэтэ 1987 сыллаахха өрөспүүбүлүкэҕэ биир бастакынан общественнай тэрилтэ быһыытынан тэриллибитэ, — диэн кэпсээтэ мунньах кэнниттэн кэккэ сылларга общественнай төрүккэ бэтэрээннэр сүбэлэрин салайа сылдьар Данил Аргунов. — Ыччаты кытары биһиги түмсүүлэрбит балай эмэ үлэни ыыталлар — араас көрсүһүүлэри, күрэхтэһиилэри тэрийэллэр, онно саастаах дьоммут көхтөөхтүк кытталлар. Олохтоох дьаһалталар сэрии, тыыл, үлэ бэтэрээннэригэр, ону сэргэ сэрии сылларын оҕолоругар төһө кыалларынан олорор усулуобуйаларын тупсарыыга, доруобуйаларын бөҕөргөтүүгэ үлэлэһэллэр. Билигин улууспутугар сэрии кыттыылааҕа хаалбата, 232 тыыл бэтэрээнэ, 3 Ленинград блокадатын кыттыылааҕа, биир концлааҕырга оҕо эрдэҕинэ сылдьыбыт киһи, ону сэргэ 31 сэрии кыттыылаахтарын огдооболоро олороллор. Өссө 608 сэрии сылларын оҕолоро дэнэр бэтэрээннэрдээхпит, 103 бойобуой дьайыыларга кыттыбыт буойуттардаахпыт. Бука барыларыгар нэһилиэктэринэн, социальнай харалта сулууспатынан болҕомто ууруллар. Бэтэрээннэр доруобуйаларын бөҕөргөтүүгэ, Дьокуускайдааҕы Гериатрическай кииҥҥэ баран эмтэниигэ путевкалары бэриллэр квотанан хааччыйыы салҕанар. Сотору Улуу Кыайыы 80 сылын бэлиэтиэхпит. Эбии тэрээһиннэри ыытыыга, бэчээт бородууксуйатын таһаарыыга, ытык дьоммутун чиэстээһиҥҥэ эҥин Кыайыы пуондата счетыгар 25 эрэ тыһ. солкуобай үптээх. Онон мунньахха улуус баһылыгын э.т. Василий Андреев пуонданы хаҥатыыга Ыҥырыы таһаарары ирдээтэ. Ону бар-дьоммут өйүө диэн эрэнэбит!
Кыайыы өрөгөйдөөх күнүгэр дылы икки ыйы хаппатбириэмэ хаалла… Көмөлөһүөҕүҥ!
Людмила Аммосова.