I Дьөппөн олохтоохторо, эдэр ыал Вера уонна Спиридон Яндреевтар сүөһү иитиитинэн дьарыктаналлар, хаһаайыстыбалаахтар. Аан бастаан 4 ынахтан саҕалаабыттара, билигин 98 төбөнү кыстатан тураллар диэн «Саха» НКИХ сонуннарыгар өссө тохсунньуга кэпсээн турабын.
Сүөһүлэрин кыстаппыт 1986 сыллаахха тутуллубут хотонноро эргэрэн, эмэҕирэн турар. Кулун тутар ыйбыт улахан аҥара ааста, хотон хаарын түһэрэр кэм кэллэ. Яндреевтар үлэһиттэрэ күн бэҕэһээ хотон хаарын түһэрэ сылдьан эмэҕирбит маска үктэнэн дьөлө түстэ, эчэйбэтэҕэр махтал.
Маассабай төрүөх саҕаланан, хотоҥҥо турар 51 ынахтан 35 ынах төрөөн күнүстэри-түүннэри хаһаайыстыбалаахтар түбүктэрэ үксээбит. Бу Вера Яндреева дууһатын кыланыытын видеоҕа устан ыытта.
Фермер ыал саҥа, аныгылыы быһыылаах, бары ирдэбилгэ эппиэттиир, үлэлииргэ-хамсыырга табыгастаах хотон туттаары туруорсубуттара үс төгүрүк сыл буолла. Билигин хотон тутуутугар докумуоннары хомуйаллар, бырайыактыыр-экспертиза түмүгүн күүтэллэр. Эдэр дьон өйөбүл ылан, саҥа хотону хайаан да туттуохтарын наада.
Кинилэр кыһалҕаларын нэһилиэк баһылыга Андрей Яковлев, улуустааҕы Тыа хаһаайыстыбатын департаменын салайааччыта Андрей Архипов, Ил Түмэн дьокутаата, «Өктөөп 50 сыла сопхуос» ТХПК салайааччыта Тихон Скрябин үчүгэйдик билэллэр. Тыа сиригэр бэйэ олохтоох аһын-үөлүн оҥорор туруу үлэһит эдэр дьон туруорсууларын олоххо киллэрэргэ бары күүс-көмө, быһаччы сүбэ-ама биэрэн дьыаланы хамсаталларыгар баҕарабыт. Маны «Хаҥалас» редакцията тус хонтуруолугар тутуоҕа, үлэ хаамыытын сырдатыаҕа.
Уйбаан УЙГУУРАП.
Вера ЯНДРЕЕВА видеоҕа устуута: https://t.me/gazetahangalas/36107