«Бастион памяти» акция
Хаһыаппыт кулун тутар 7 күнүнээҕи нүөмэригэри ”Бастион памяти” диэн Саха өрөспүүбүлүкэтигэр биллэриллибит акция саҕаламмытын Ил Дархан Айсен Николаев иһитиннэрбитин туһунан сырдатан турабыт.
Онно Сахабыт сирэ Смоленскай, Калужскай, Псковскай уонна Новгородскай уобаластарга Аҕа дойду Улуу сэриитин бастакы сылларыгар кырыктаах кыргыһыыларга сылдьан сырдык тыыннара быстыбыт биир дойдулаахтарбытыгар анаан өйдөбүнньүк туруорарга быһаарыммытын биллэрбиппит. 2263 испииһэккэ сылдьар дьон ортотугар 104 киһи Орджоникидзевскай (билигин Хаҥалас) оройуонуттан Кыһыл Армияҕа ыҥырыллан баран фронтан эргиллибэтэҕин испииһэктэн билбиппит.
1995, 2005 сылларга улуустааҕы бэтэрээннэр сэбиэттэрин көҕүлээһининэн фронтовик Михаил Соколов салалтатынан улууспутугар тахсыбыт кыһыл тастаах икки «Өйдөбүнньүк кинигэҕэ» сэриигэ өлбүттэр испииһэктэрин кытары дьоммут ааттарын чуолкайдаары нэһилиэктэринэн тэҥнээн көрөн баран дааннайдарга сыыһалар-халтылар баалларын биллим. Ол курдук, сорох буойуттар төрөөбүт сыллара, аҕаларын аата, өлбүт дааталара о.д.а. сибидиэнньэлэрэ сөп түбэспэттэр. Сорохтор испииһэккэ киирбэтэхтэр эбэтэр хантан сылдьаллара, эмиэ да өлбүттэрэ биллэр даҕаны,ханна көмүллүбүттэрэ суох. Онтон төрөөбүт дойдуларын аатыттан Өйдөбүнньүктэргэ киллэрэргэ эбии чуолкайдааһын ирдэнэр. Итинэн сибээстээн биһиги, улуустааҕы редакция кэлэктиибэ, үрдүкү тэрилтэбит «Сахабэчээт» САТ бу акцияҕа кыттарынан, нэһилиэктэр олохтоох дьаһалталарын сэрии хонуутугар хаалбыт буойуттарын ааттарын-суолларын чуолкайдыыргытыгар уонна төһө кыалларынан дьоҥҥут туһунан туох саҥаны булбуккутун суруйаргытыгар көрдөһөбүт. Кэлэр көлүөнэлэргэ дойдубут кэскилин туһугар олохторун толук уурбут чугас дьоммут ааттара сөпкө суруллуохтаах!
Итини сэргэ хас даҕаны сүүһүнэн киһи сураҕа суох сүппүтэ биллэр. Баҕар, кинилэр сулууспалаабыт чаастара ити уобаластарга кыргыһыыларга кытта сылдьалларын туһунан саллааттарбыт дьонноругар суруйбут буолуохтарын син. Бу кэриэстэбил акциятыгар испииһэккэ киирбиттэр тустарынан сибидиэнньэлэри анал сигэнэн көрүҥ диэн сүбэлээбиппитинэн, бэйэлэрин буойуттарын ааттарын булбут нэһилиэктэр баар буолтара үөрдэр. Ол курдук, ирдиир үлэни ыыта, чинчийэ сылдьар тиит-арыылар испииһэктэрин чөкөтөн эрэллэрин астына истэбин. Хайаан да дьоҥҥут ааттарын-суолларын чуолкайдааҥ, бу сигэнэн киирэн көрүҥ диэн сүбэлиибин: https://ханаласгазета.рф/60030-2/
Электроннай аадырыспыт: gaz_han@mail.ru
Людмила Аммосова.