Өктөм нэһилиэгэр Анна Степанова дьэрэкээн тюльпаннары үүннэрэн үгүс дьону үөртэ. Билигин, төһө да Аан дойду дьахталларын күнэ аастар, Анна оҥорбут фотозонатыгар баҕалаахтар кэлэн хаартыскаҕа түһэн, бэлэх тюльпан ылан, умнуллубат кэрэ түгэни өйдөрүгэр хаалларан бараллар.
2024 сыллаахха социальнай хантыраак нөҥүө үбүлэнэн анал дьиэ-уот туттан, луковицалары, олордор поддоннарбын сакаастаан ылбытым. Сибэккилэрбин тохсунньуга олордон саҕалаабытым, онтуктарым анаан-минээн Аан дойду дьахталларын күнүгэр ситэннэр, атыыга бардылар. Өктөмтөн чугас сытар нэһилиэктэртэн, Покровскайтан, Дьокуускайтан кэлэн ыллылар, ону сэргэ Бүлүү куоракка тиийэ сакаас кирбитигэр ыыппыппыт. Онон бастакы саҕалааһыммыт үчүгэй.
Тюльпан гидропоникаҕа үүнэр, турар сиригэр кыраадыс +10, +12 үрдүө суохтаах, анал уот-күөс баар буолуохтаах. Бу сибэкки сөрүүн сиргэ турарын сөбүлүүр. Быйыл 6 тыһыынча луковица олордубуппуттан бу эрэ ордон турар, төрөөбүт күннээх, үбүлүөйдээх дьон, дьоро киэһээлээхтэр кэлэн ылыахтарын сөп. Инникитин сибэкки олордуутунан дьарыктанар былааннар бааллар. Бастаан үүннэрэр сирбэр гаас ситимин киллэрэн, дьиэтин-уотун кэҥэтэр санаалаахпын, — диэн кэрэ тюльпаннар хаһаайкалара Анна Степанова кылгастык кэпсээтэ.
Татьяна Владимирова.