Оччолорго Хаҥаласпытыгар “Советтар знамялара» диэн икки балаһалаах хаһыат нэдиэлэҕэ иккитэ тахсара, редакторынан суруйааччы Исай Никифоров үлэлиирэ.
Уоттаах сэрии буола турара, хас нүөмэр аайы Совинформбюро матырыйааллара тахсаллара. Дойдуга ыарахан балаһыанньа этэ даҕаны, дьон Кыайыыга бигэ эрэллээҕэ, туох кыалларынан көмөлөһөр дьулуурдааҕа. Биһиги редакциябытыгар бастакы нүөмэртэн саҕалаан бары нүөмэрдэр подшивкаҕа тиһиллэн харалла сыталлар.
Улууспутугар төһө даҕаны үлэни кыайа-хото тутар эр дьоммут фроҥҥа ыҥырыллан Ийэ дойдубутун көмүскүү бардаллар, хаалбыт оҕо-дьахтар, кырдьаҕастар, доруобуйаларынан сыыллыбыттар хаалан сүөһүнү-сылгыны энчирэппэккэ тутан эрэ буолбакка, дойдуга көмөлөһө олорбуттара хаһыакка суруйуулартан көстөр. Үлэҕэ-хамнаска ситиһиилэр эрэ буолбакка, кириитикэ кытаанаҕа манна баар эбит. Олортон кылгастык билиһиннэрэбит.
Кэлэр дьылга өссө ордук үлэлиэхпит
1-Дьөппөн. Мин Буденнай аатынан колхоз 2 №-дээх звенотун салайабын. От хомуурун бириэмэтигэр колхоз правлениета биһиги звенобутугар 1008 центнер оту оттуурга былаан биэрбитин биһиги 1469 центнерынан толорбуппут.Бастыҥ үлэлээх звено членнэрэ К.А.Пестерев 27, А.Ф.Дмитриев – 17 центнер оту ыллылар.
…Биһиги звенобут быйыл 141 гектар сиргэ хаартиптэриитин үчүгэй хаачыстыбалаахтык ыытта.
Н. Марков, Буденнай аатынан колхоз звенотун звеновода.
(01.01.1942 с.).
Дойдуга элбэх түүлээҕи биэрэр иһин охсуһабын
Евдокия Архипова, 2-Дьөппөн нэһилиэгинээҕи “Сырдатыы” колхоз булчута.
Мин кыра сааспыттан бултуурга үөрэммитим. Сылын ахсын түүлээҕи бултааһыҥҥа дуогабарбын куруутун аһары толоробун.
1941 сыллааҕы дуогабарбын 141% толордум. Билигин 1942 сыл 1 кыбаарталлаах былааммын 200%-тан итэҕэһэ суох толорорго бэйэбэр сорук туруорунабын уонна мин курдук,дьахталлар, бултуу үөрэнэргитигэр баҕарабын.
15 центнер балык бултанна
I-Малдьаҕар үс колхозтара холбоһон 9 киһилээх балык бултааһыныгар биригээдэ тэрийдилэр.
Кинилэр муҥхалаан 15 центнер собону бултаан былааннарын 50 % толордулар.
С.Едисеев.
16.03.1942 с.
Балык булдугар күүстээх тиэмпэни
Балык булдун сайыннарыы билигин улахан хаһаайыстыбаннай-политическай суолталаах. Маны оройуон колхозтаахтара өйдүүллэр. Ол курдук, 3-Малдьаҕар Чкалов уонна Ворошилов ааттарынан колхозтар былааннарын толордулар. Манна уһулуччу кыһамньылаахтык үлэлиир Н. Рожин. Кини Ворошилов аатынан колхоз биригэдьиирэ, түөрт ааннаах быһыты быстаран 2 центнер сыалыһар балыгы туттарда:
— Мин оҕом төрөөбүт Ийэ дойдутун көмүскүүр. Онтон мин бултаабыт балыгым хааннаах фашизмы суһаллык үнтүрүтүүгэ көмө буолуо этэ, — диир кини.
Дьыала барыта ити курдук буолбатах. 1-Малдьаҕар нэһилиэгинээҕи “Өктөөп суолунан” колхоз балыксыттарынбиригээдэлэрэ үлэни олох тохпуттар. Ити колхозтар бэрэссэдээтэллэрэ төһө балыгы бултаабыттарын билбэттэр…. Совет председателлэрэ балык бултааһынын туһунан түһээн да көрбөттөр…
И. Портнягин.
Кыһарҕаннаах кэмнэргэ
Бу сылларга оройуоммут олохтоохторо икки хараҥаны ыпсара күннээҕи ыарахан үлэттэн ордон Кыайыы туһа диэн олус элбэх нолуогу төлүүллэрэ, сайыамҥа суруттараллара, ичигэс таҥаһы тигэн аармыйаҕа ыыталлара, байыаннай бэлэмнэниини баран дьарыктаналлара. Ону таһынан аны өстөөх билиэниттэн босхоломмут нэһилиэнньэллээх пууннарга көмө оҥорон түбүгүрэллэр эбит… Ол туһунан ити кэминээҕи хаһыаппыт суруйар.
Фашисткай билиэнтэн босхоломмут гражданнарга
2-Дьөппөн. Начаалынай оскуола үөрэнээччилэрин төрөппүттэрин уопсай мунньахтарыгар колхозтаах 10 дьахталлар мустубуттар. Манна фашистскай билиэнтэн босхоломмут советскай гражданнарга ис, тас таҥастары ыытыы туһунан Покровскай поселогынааҕы 3 №-дээх агитационнай учаастакка олорооччу дьиэ хаһаайкалара ыҥырыы суруктара дьүүллэһилиннэ.
Бу ыҥырыыны колхозтаах дьахталлар биһирээн туран ылыннылар уонна 14 устуука араас ис уонна тас таҥастары биэрдилэр.
А.Прокопьева.
(09.01.1945 с.).
Иһитиннэриилэри хаһыаттан Людмила Мордовская бэлэмнээтэ.