Уот сэрии ортотунан
Аҕа дойду Улуу сэриитэ биир да ыалы тумнубатаҕа. Сэрии, тыыл ветераннарын хорсун быһыыларынан, тулуурдарынан, дьулуурдаах үлэлэринэн, сырдык ыраларынан эстибэтэхпит биһиги, сахалар.
Мин таайдарым бырааттыы Киприяновтары ахтан аһарыахпын баҕардым. Бырааттыы Е.Н. Киприянов-1, Г.Н. Киприянов, А.Н. Киприянов, кинилэр аймахтара (Аммос оҕонньор оҕолоро) Е.Н. Киприянов-2, Е.К. Киприянов бары сэриигэ ыҥырыллан ытык иэстэрин чиэстээхтик толорбуттара.
Гаврил Киприянов (Курунньук оҕонньор кыра уола) сэрииттэн эргиллибэтэҕэ. Гаврил сэриигэ 18-гар барбыта уонна сураҕа суох сүппүтэ. Кини мэлдьи сүүрбэччэлээх буолан биһиги өйбүтүгэр хаалбыта.
Егор Киприянов фроҥҥа 1941 сыллаахха барбыта,минометчик этэ, Сибиир дивизиятыгар сэриилэспитэ. Алтатөгүл атакаҕа киирэ сылдьыбыта, иккитэ бааһырбыта. Брянскай фроҥҥа сылдьан биир дойдулааҕын Кириллин Никитаны уонна Алексей Егоровы көрсүбүтэ. Госпитальга эмтэнэн баран II группалаах инбэлиит буолан дойдутугар төннүбүтэ. Кини араас сылларга Сэбиэт председателинэн, биригэдьииринэн, сельпо председателинэн үлэлээбитэ, кооперация туйгуна буолбута. Кини сэттэ оҕолоох, 17 сиэннээх.
А.Н. Киприянов сэриигэ 1943 сыллаахха ыҥырыллыбыта. Кини Забайкальеҕа сылдьыбыта. Олоҕун бүтэһик сылларыгар «Октябрь 50 сыла» совхозка сүөһү көрбүтэ.
Киприянов Е.Н.-2 сэрии бастакы күннэриттэн Москва аттынааҕы кыргыһыылартан саҕалаан Берлиҥҥэ тиийэ сэриилэспитэ. Кини 76 мм пушкаҕа наводчиктаабыта. Егор Николаевич Смоленскай, Орловскай, Брянскай уобаластарга, Белоруссияҕа буолбут кыргыһыыларга кыттыбыта, Венгрияҕа, Чехословакияҕа, Германияҕа сэриилэспитэ, Берлини штурмаласпыта. Ити түөрт аҥар сыл устатыгар иккитэ ыараханнык бааһырбыта.
Сэрии кэнниттэн Егор Киприянов-2 Германияҕа өссө биир сыл сулууспалаабыта. Буойун «Хорсунун иһин», «Варшаваны босхолооһун иһин», «Бойобуой үтүөлэрин иһин», “Москваны обороналааһын иһин”, «Кенигсбери ылыы иһин», «Берлини ылыы иһин» мэтээллэрдээҕэ.
Дойдутугар төннөн баран сайынын окко, кыһынын котельнайга үлэлиирэ. Кини норуот хонтуруолун бөлөҕүн чилиэнэ этэ, сэттэ оҕолооҕо, 13 сиэннээҕэ.
Егор Киприянович Киприянов Японияны кытта сэриигэ сылдьыбыта. Егор Киприянович сэрии бүппүтүн кэннэ колхозка, совхозка өр сылларга чиэһинэйдик үлэлээбитэ.
Кыайыы 50 сылын туолбут үбүлүөйдээх сылга таайдарым Киприяновтар үтүө ааттарын дьон-сэргэ биллин, эдэр көлүөнэ дьон кинилэр олохторуттан холобур ыллын диэн санаалаах кинилэр сырдык кэриэстэригэр сүгүрүйэн туран бу ахтыыны суруйдум.
Зинаида Кононова, учуутал. (II-Дьөппөн нэһилиэгэ, «Өлүөнэ очуостара» 1995 с. от ыйын 11 күнэ).