Нөмүгү нэһилиэгэр билигин 8 тыыл бэтэрээнэ, ол иһигэр биир сэрии огдообото, 26 сэрии сылларын оҕолоро олороллор.
Улуу Кыайыы 80 сылынан үбүлүөйүнэй мэтээли уонна Российский Федерация Президенэ Владимир Путин, Саха Өрөспүүбүлүкэтин Ил Дархана Айсен Николаев эҕэрдэ суруктарын нэһилиэкпит тыыл бэтэрээннэригэр туттардыбыт. Мэтээли уонна олохтоох үүт ас бородууксуйатын туттарарга Нөмүгү нэһилиэгин баһылыга Наум Устинов, Чечня сэриитин бэтэрээнэ Дмитрий Захаров, Анал байыаннай дьайыы кыттыылааҕа Роман Поликарпов, оскуола үөрэнээччилэрэ Дьулуур Григорьев, Эрчим Яковлев уонна мин сырыттыбыт.
Широких Любовь Саввична ааспыт сыл алтынньытыгар 90 сааһын туолбута, кэргэнинээн Афанасий Гаврильевичтыын холбоһон олорбуттара 65 сылын бэлиэтээбиттэрэ.
Ытык киһибит Матвеева Ульяна Гаврильевна таһырдьа салгын сии олороругар түбэстибит. Мэтээлбитин, бэлэхпитин туттаран хаартыскаҕа түстүбүт. Ульяна Гаврильевна быйыл күһүн эмиэ 90 сааһын туолуохтаах.
Биир кырдьаҕаспыт Ильина Христина Титовна кыыһын Оксана Прокопьевна дьиэтигэр соҕотоҕун олорон көрүстэ. Өй-мэйии мааны, бэлиитикэни сэҥээрэн көрөр эбит, үөрэ-көтө кэпсэтэн, махтанан атаартаата.
Аркадьева Евдокия Мироновна тыыл бэтэрээнэ, Нөмүгүгэ соҕотох хаалбыт сэрии огдообото. Былырыын 90 сааһын туолбута. Кэпсээнэ-ипсээнэ элбэх: сэрии саҕана тугу үлэлээбиттэрин, бииргэ үлэлэспит дьонун ааттарын барытын үчүгэйдик өйдүүр эбит. Элбэх интэриэһинэй сонуну киниттэн иһиттибит, биллибит. Видеоҕа уһула кэлиэх буолан тарҕастыбыт.
Архипова Марфа Лукинична бэйэтин дьиэтигэр соҕотоҕун олорор. Кини дьиэтин таһыгар кыыһа дьиэкэргэнинээн бааллар. Эбээлэрин сиэннэрэ көрө-истэ сылдьаллар. Олорор дьиэтэ өрөмүөҥҥэ наадыйар эбит. Наум Васильевич болҕомтоҕо ылан көмөлөһүөх буоланэрэннэрдэ. Онон Марфа Лукиничнаҕа, тыыл бэтэрээнигэр, үбүлүөйдээх сылга көмө оҥоһуллуо диэн эрэнэбит.
Бу күннэргэ нэһилиэкпит ытык-мааны кырдьаҕаһа, тыылбэтэрээнэ Ермолаева Анна Алексеевна 95 сааһын томточчу туолла. Анна Алексеевна 1930 сыл кулун тутар 17 күнүгэр Нөмүгү сиригэр Ис Бүтэйгэ Мария Егоровна, Алексей Петрович Ермолаевтар дьиэ кэргэҥҥэ күн сирин көрбүт. Аҕата 1937 сыллаахха, ийэтэ 1943 сыллааххаөлөннөр 13 сааһыгар тулаайах хаалан эдьиийигэр Пелагея Алексеевнаҕа иитиллибит. Покровскайга 8-с кылааһы бүтэрэн баран Дьокуускай куоракка музыкальный училищеҕа вокал кылааһыгар үөрэххэ киирэр. Ону бүтэрээт 1955 сыллаахха радиокомитет хоругар үлэҕэ ылыллар. 1958 сыллаахха радио хора Дьокуускай куорат музыкальнайдраматический театрын хора буолар. Онон Анна Алексеевна театр хорун артыыһа буолар. Биир сиргэ уһуннук үлэлээн 1986 сыллаахха сынньалаҥҥа тахсар. Билигин кыыһыгар Нөмүгүгэ олорор.
Кыайыыны уһансыбыт ытык дьоммутугар нэһилиэк олохтоохторун ааттарыттан махталбытын тиэрдэбит уонна чэгиэн туругу, бары үтүөнү баҕарабыт.
Надежда Егорова, Нөмүгү бэтэрээннэрин сэбиэтин бэрэссэдээтэлэ.