Нэһилиэктэргэ
Бу күннэргэ Булгунньахтаахха Акулина Львова бааһынай-фермерскэй хаһаайыстыбата «Өкүлүүнэ» диэн бэйэ аһын оҥорон таһаарар сыаҕы үлэлэттэ. Саҥа сыахха ынах, сылгы, сибиинньэ этиттэн фарш, тефтель, кэтилиэт, пельмень уо.д.а. полуфабрикаттары оҥорон таһаараллар, ону сэргэбуотарах, быар-бүөр – төрүт аспыт арааһын атыылыыллар. Тыа хаһаайыстыбатыгар өр сыл үлэлиир Акулина Егоровна маннык сыах арынар ырата олоххо киирэн үөрүүтэ муҥура суох.
— Бу бэйэбит күүспүтүнэн – кэргэним, күтүөттэрим туппут СИП-панельтан дьиэбитин былаан быһыытынан ааспыт сыл сэтинньитигэр үлэҕэ киллэриэхтээх этибит. Ол эрээри, сир-уот докумуона, араас ирдэбилгэ, санитарнай нуормаҕаэппиэттиир гына оҥоруу, гаас-уот холбонуута бириэмэни, сыраны ылар эбит. Ыллыҥ да маннык эбийиэги туппаккын, аҥардас сири ыларга араас уустуктар бааллар. Матырыйаалбытын барытын бэйэбит уйуннубут. Былырыын 1 мөл 750 тыһ. солкуобай суумалаах улуус гранын сүүйэммин сыахпыт толору тэрилин атыыластыбыт. Онон улуустан өйөбүл ылан, баҕам туолбутугар махтанабын. Инникитин эбии өссө эти ыыһыыр тэрили ылар баҕалаахпыт. Сыахпытын кыһыннары эрэ буолбакка, төгүрүк сыл үлэлэтэр баҕалаахпыт. Сайын бэйэбит дойдубутугар үүнэр араас отону, үүнээйини астаан дьарыктанар былаан баар. Бэйэм «Хаҥалас-Ас» ТХПК үлэлиибин, онно уопутуран оҕолорбун, сиэннэрбин үөрэтэбин. Билигин сүүрдэххэ-көттөххө эрэ туох эрэ табыллар, үөһэттэн бэлэм харчы түспэт. Бэйэбит сырьебут буолан киһи ылсыан сөптөөх үлэтэ дии саныыбын, — диэн саҥа сыах хаһаайката Акулина Егоровна кылгастык үлэтин кэпсээтэ, былаанын үллэһиннэ.
Бу курдук бэйэ аһын дэлэтэр дьоммутугар саҥа саҕалааһыннарыгар ситиһиини баҕарабыт.
Ольга Гермогенова.