«Rektime» рекламнай хампаанньа бирииһигэр Самыртай сыһыытын нэһилиэктэрин XIX-с спартакиадатын аһыллыытын үөрүүлээх чааһа Хачыкаат нэһилиэгин “Сарыал” култуура киинин саалатыгар буолла. Тиит Эбэ, Күөрдэм уонна Хачыкаат нэһилиэктэриттэн иккилии хамаандалар сүүмэрдэнэн, талыллан кэлбиттэр. Барыта 430 киһи спорт 11 көрүҥэр күрэхтэстэ. Күрэс сүрүннүүр дьүүлдьүтүнэн улуус Спортка управлениетын исписэлииһэ Максим Семенов үлэлээтэ.
Бастакы күн мас тардыһыытыгар, волейболга, дартс көрүҥэр күрэхтэстилэр. Киэһээҥҥи өттүгэр биллиилээх артыыстар кыттыылаах кэнсиэр уонна конкурс тэрилиннэ. Сүрүн тэрийээччилэринэн Хачыкааттан төрүттээх дьоһун дьон, «Rektime» рекламнай хампаанньа салайааччылара бырааттыы Афанасий уонна Абек Киприяновтар буолаллар.
— Дойдубутугар Хачыкаакка 19-с төгүлүн бу спартакиаданы ыытан эрэбит. Хамсык дьаҥа турбатаҕа буоллар быйыл үбүлүөйдээх тэрээһин буолуохтаах этэ. Манна дьон сүрдээҕин баҕаран туран кыттар, онон биһиги биир дойдулаахтарбытын өйүөх эрэ тустаахпыт. Спартакиадаҕа оҕолор, улахан дьон уонна саастаах дьон күрэхтэһэр буоланнар кыттааччы элбэх. Урут кытта сылдьыбыт дьон атын улуустартан анаан үлэлэриттэн көҥүллэтэн кэлэн күрэхтэһэллэр, — диир сүрүн тэрийээччи Афанасий Киприянов.
Самыртай сыһыытын олохтоохторо сылы быһа кэтэһэр тэрээһиннэрин иккис күнүгэр хапсаҕайдаһан тустууга, мини-футболга, дуобакка, саахымакка, сахалыы остуол оонньууларыгар хабылыкка, хаамыскаҕа, остуол тенниһигэр, ханаат тардыһыытыгар эрбии биитинии эристилэр, илин-кэлин түстүлэр. Тиит Эбэттэн быраас Семен Никифоров бастакытын кытынна.
— Дьон-сэргэ олус түмсүүлээх эбит. Манна кэлэн элбэх киһини кытта билистим. Күрэхтэһиини астына көрө сылдьабын. Мас тардыһыытыгар мадьынылар истэригэр олус күүстээхтэр бааллар эбит, — диэн санаатын кылгастык үллэһиннэ.
Ыһыылаах-хаһыылаах үгүс ыалдьааччылаах көрүҥүнэн өбүгэлэрбит оонньуулара мас тардыһыыта буолла. Хаҥалас улууһун илин эҥэр нэһилиэктэригэр мас тардыһар мадьынылары киһи мыына көрбөт уоланнара бааллар. Нэһилиэктэринэн I Дьөппөн 1-кы хамаандата кыайыылаах, II Дьөппөн 1-кы хамаандата – иккис миэстэ, Хачыкаат 1 хамаандата үһүс миэстэ буоллулар.
Волейболга ким бастыыра оччо биллибэт, тэҥ оонньууга сытыы киирсиилэр хайа да өттүгэр буоллулар. Эргиир систиэмэтинэн ыытыллыбыт күрэххэ Хачыкаат 2-с хамаандата эр дьоҥҥо бастаата, 1-кы хамаандата – иккис, 2-с хамаандата дьахталларга үһүс миэстэ буолан үөрүү өрөгөйүн биллэ. I Дьөппөн дьахталларга 2-с хамаандата бастаата, 1-кы хамаандата иккис буолла. Эр дьоҥҥо 3-с бочуоттаах миэстэни ыллылар. Бэрт сыралаах хардарыта хотуһуулаах оонньууларга ким үчүгэй бэлэмнээх ол кыайда. Волейболистар оонньууларыттан көрөөччүлэр дуоһуйдулар уонна астыннылар.
Нэһилиэк баһылыктара хамаанданы тэрийэн түмэн эрэаҕалбакка, көрөөччү эрэ буолбакка, спорт биир көрүҥэр кыттыахтаахтар диэн усулуобуйа сайдан, нэһилиэккэ баар тэрилтэлэр оскуола, балыыһа, ОДьХХ, почта, оҕо уһуйаана, ТХПК, бэтэринээринэй учаастак, кулууп салайааччылара кыттар буолбуттара үгэскэ кубулуйбут.
— Салайааччы бэйэтинэн кытыннаҕына тэрээһини ордук чугастык ылынар, өйдүүр. Кэлиҥҥи сылларга Сахабыт сиригэр анал федерациялаах «Дартс» саҥа көрүҥҥэ кэрэ аҥардарбыт дьиэҕэ бүгэн таах олорботуннар эрэ диэн кыттыбыт буоллахтарына, аны бу көрүҥҥэ тэрилтэлэр салайааччылара кыттыһан, бириистээх миэстэҕэ тиксэн бэлэх ыллыннар диэммит бу көрүҥү киллэрдибит, — диир Абек Владимирович.
Бастакы күнү түмүктүүр дартс көрүҥэр Хачыкаат 2-с хамаандата бастаата, II Дьөппөн 1-кы хамаандата иккис уонна үһүс бириистээх миэстэни I Дьөппөн 1-кы хамаандата ылла.
Иккис күн хапсаҕайдаһан тустууттан саҕаланна. Күүтүллүбүтүн курдук бэрт сытыы хамсаныылардаах, сылбырҕа хапсаҕайдьыттар нэһилиэктэрин хамаандатын туһугар сымса хамсаныылаах тустуулара көрөөччүлэри сэҥээртэ. Бастакы миэстэни II Дьөппөн 1-кы хамаандатаылла. Иккис миэстэни Хачыкаат 1-кы хамаандата ылла уонна үһүс бочуоттаах миэстэҕэ Хачыкаат 2-с хамаандата тигистэ.
Мини-футболга алта хамаанда кытынна. Сытыы киирсиилэр буоллулар, күүстээх тэбиилэр, чаҕылҕанныы хардарыта атаакалар. Мээчик төттөрү—таары төкүнүйэ сүүрэн-көтөн биэрдэ. Түмүккэ, 1-кы миэстэни II Дьөппөн 1-кы хамаандата ылла, иккискэ, Хачыкаат нэһилиэгин 1-кы хамаандата таҕыста уонна үһүс бириистээх миэстэҕэ II Дьөппөн 2-с хамаандата тигистэ. Сылтан сыл, футболистар оонньуур таһымнара үрдээн иһэр. Футболу таптыыллар!
Дуобакка 1-кы миэстэни II Дьөппөн 1-кы хамаандата ылла. Иккис миэстэҕэ I Дьөппөн 1-кы хамаандата таҕыста. Үһүс бириистээх миэстэҕэ Хачыкаат-1 хамаандата тигистэ.
Саахымакка Хачыкаат 1-кы хамаандата кыайда. Хачыкаат 2-с хамаандата иккис буолла, I Дьөппөн 1-кы хамаандата үһүс үктэлгэ таҕыста.
Сахалыы остуол оонньуулара улууспутугар сайдан эрэрин бэлиэтэ бары кэриэтэ оонньуур таһымнара үрдүгэ, сатабыллаахтара буолар. Күрэхтэһии хара маҥнайгыттан олус көхтөөхтүк барда. Хабылыкка уонна хаамыскаҕа II Дьөппөн 1-кы хамаандата бастаата, иккис миэстэҕэ – I Дьөппөн 2-с хамаандата уонна үһүскэ Хачыкаат 1-кыхамаандата таҕыста.
Остуол тенниһэ эмиэ туһугар олус хатыһыылаахтык барда. Теннис мээчигэ элэҥнээн олордо. Араас эрийиилэрдээх, охсуулардаах теннисчиттэр тиритэ-хорута оонньоотулар. Манна II Дьөппөн 2-с хамаандата бастаата. Иккис Хачыкаат 1-кы хамаандата, үһүс миэстэ Хачыкаат 2-с хамаандата буолла.
Түмүктүүр көрүҥүнэн, өрүү буоларын курдук, ханаат тардыһыыта буолла. Бу сырыыга Хачыкаат 2-с хамаандата бастаата. II Дьөппөн 1-кы хамаандата – иккис уонна Хачыкаат 1-кы хамаандата үһүс миэстэлэри үллэһиннилэр.
Самыртай сыһыытын нэһилиэктэрин XIX-с спартакиадата икки күн устата Хаҥалас улууһун Илин эҥэр нэһилиэктэрин олохтоохторугар спорт, чөл олох, түмсүү уонна сомоҕолоһуу бырааһынньыгынан буолла. Спартакиада хомпоруун хотой быһыылаах улахан кубогын Ирина Оболкина баһылыктаахХачыкаат нэһилиэгин хамаандата эрэллээхтик кыайан ылла!Иккис миэстэҕэ баһылык э.т. Ольга Петухова салайааччылаах II Дьөппөн нэһилиэгэ таҕыста. Андрей Яковлев баһылыктаах былырыыҥҥы кыайыылаах, I Дьөппөн нэһилиэгэ бу сырыыга үһүс бочуоттаах миэстэҕэ тигистэ.
«Rektime» рекламнай бөлөх салайааччылара биир дойдулаахтарбыт Афанасий уонна Абек Киприяновтар инникини өтө көрөн тэрийэр тэрээһиннэрэ сылтан сыл далааһыннанан иһэр. Спартакиада түмүктэннэ, былаах түстэ. Хас көрүҥ ахсын миэстэлэспит дэгиттэр дьон дьоһуннаах мэтээллэринэн, грамоталарынан, сыаналаах бириистэринэн наҕараадаланнылар. Илин эҥэр нэһилиэктэри биир түмсүү оҥорор, дьон-сэргэ күүтэр тэрээһинэ спортка, чөл олоххо көҕүлүүр спартакиаданан буолар. Доруобуйа баар буоллаҕына үлэ, үөрэх, дьол-соргу аргыстаһар, чэгиэн-чэбдик киһи бу олоххо ситиһиилээх буолар.
Уйбаан УЙГУУРАП,
ааптар хаартыскаҕа түһэриитэ уонна видеоҕа устуута.