1987 сыл бэс ыйын 15-17 күннэригэр Аммаҕа Улуу Өктөөп 70 сылыгар анаммыт XI спартакиада ыытыллыбыта. Күрэххэ 22 хамаанда, 509 спортсмен кыттыбыта.
Хапсаҕай тустууга эр дьоҥҥо 53 киилэҕэ Семен Ноев (Орджоникидзевскай) чемпионнуур, Роман Уйгуров (Алексеевскай) бу сырыыга иккис буолбута, Алексей Стручков (Мэҥэ Хаҥалас) – үһүс миэстэ буолар. 60 киилэҕэ Роман Цыпандин (Амма) бастакы миэстэҕэ тахсыбыта, Степан Павлов (Алексеевскай) — иккис, Иннокентий Аянитов (Уус Алдан) үһүс миэстэҕэ тиксэр. 70 киилэҕэ Кирилл Захаров (Чурапчы) чемпион, Николай Черкашин (Уус Алдан) иккис, Иннокентий Егоров (Орджоникидзевскай) үһүс бириистээх миэстэни ылбыта. 82 киилэҕэ Григорий Попов (Дьокуускай) чемпионнуур, Александр Кардашевскай (Үөһээ Бүлүү) иккис, Михаил Сибиряков (Амма) үһүс бириистээх миэстэҕэ тиксибитэ. 82 киилэ үөһэ Максим Васильев (Чурапчы), Владимир Хабаров (Муома), Сергей Скрябин (Дьокуускай) суруллубуттарынан бирииһи үллэстибиттэрэ.
XI-с Манчаары Баһылай спартакиадатын абсолютнай чемпионунан Сергей Скрябин (Дьокуускай) буолбута. Хапсаҕайга хамаанданан бастаабыттара: I м – Алексеевскай оройуон, II м – Чурапчы оройуона, III м –уус-алданнар буолаллар.
Атах оонньуутугар уолаттарга кылыыга П. Захаров (Мэҥэ Хаҥалас) – 40 м 62 см бастаабыта, ыстаҥаҕа П. Захаров (Мэҥэ Хаҥалас) – 39 м 46 см бастакы миэстэҕэ тахсыбыта, куобахха П. Захаров (Мэҥэ Хаҥалас) – 33 м 45 см түһэн бастыыр. Үс көрүҥ түмүгүнэн П. Захаров (Мэҥэ Хаҥалас) – 113 м 53 см тэҥнээҕин булбатаҕа.
Эр дьоҥҥо кылыыга Василий Николаев (Бүлүү) – 45 м 29 смыстанан кыайыылаах тахсыбыта, Иннокентий Григорьев (Дьокуускай) – 43 м 14 см иккис миэстэни көрдөрбүтэ, үһүскэ Александр Иванов (Ленинскэй) – 43 м 10 см. Ыстаҥаҕа Василий Николаев (Бүлүү) – 43 м 45 см бастыыр, Иннокентий Григорьев (Дьокуускай) – 42 м 65 см иккис миэстэҕэ, үһүскэ Александр Иванов (Ленинскэй) – 42 м 41 см тахсыбыттара. Куобахха Василий Николаев (Бүлүү) – 37 м 84 см ыстанан кыайыылаах тахсыбыта, Владимир Рожков (Мэҥэ Хаҥалас) – 36 м 98 см улахан утарсыыны оҥорбута, үһүскэ Дмитрий Назаров (Мэҥэ Хаҥалас) – 36 м 46 см түспүтэ. Үс көрүҥ түмүгэ: I м Василий Николаев (Бүлүү) – 126 м 58 см, II м Иннокентий Григорьев (Дьокуускай) – 122 м 24 см, III м Александр Иванов (Ленинскэй) – 120 м 45 см.
Мас тардыһыытыгар Николай Софронов (Дьокуускай), Петр Каратаев (Дьокуускай), Виктор Николаев-Хотой (Дьокуускай) ыйааһыннарыгар чемпионнаабыттара. XI—с Манчаары Баһылай спартакиадатын мас тардыһыытыгар абсолютнай чемпионунан Василий Артемьев (Амма) буолар.
Гиирэни анньыыга 60 киилэҕэ Валерий Неустроев, 70 киилэҕэ Петр Аммосов (Амма), 80 киилэҕэ Федор Дьяконов, 90 киилэҕэ Иннокентий Шараборин (Өлүөхүмэ), 90 киилэ үөһэ Николай Потапов ыйааһыннарыгар бастаабыттара.
Оҕунан ытыыга дьахталларга Зинаида Васильева (Дьокуускай), эр дьоҥҥо Константин Бурцев (Горнай) кыайыылааҕынан буолбуттара. Оҕунан ытыыга уопсай түмүккэ Горнай хамаандата маҥнайгы миэстэҕэ тахсыбыттара.
Сүүрүүгэ эр дьоҥҥо 10000 м сүүрбүттэрэ. Гаврил Нохтунскай (Чурапчы) – 33 мүнүүтэ 17,6 сөкүүндэнэн кэлэн пьедестал үрдүкү кэрдииһигэр турбута, 5000 м Александр Иванов (Дьокуускай) кыайыылааҕынан буолар.
Бэтэрээннэргэ 3000 м Юрий Сергеев (Орджоникидзевскай) – 9 мүнүүтэ 40,6 сөкүүндэнэн фиништээн кыайыы үөрүүтүн билбитэ.
Дьахталларга 1500 м Ульяна Слепцова (Үөһээ Бүлүү) – 5 мүнүүтэ 04,2 сөкүүндэнэн кэлэн кыайыылаах тахсыбыта, кыргыттарга 1000 м Роза Докторова (Үөһээ Бүлүү) – 3 мүнүүтэ 14,9 сөкүүндэ көрдөрбүтэ уонна кыайыылааҕынан буолта.
Уопсай хамаанда түмүгэ: Мэҥэ Хаҥалас уонна Муома оройуонун хамаандата бастаабыта, иккис Чурапчы уонна Орто Халыма, үһүс Дьокуускай уонна Булуҥ оройуон хамаандалара туһааннаах кубоктарынан дипломнарынан наҕараадаламмыттара.
Василий МОЖУКОВ, СӨ спордун бэтэрээнэ, Покровскай к.