Култуура эйгэтигэр
Бу дэгиттэр талааннаах музыка, ырыа аргыстаах, учуутал дьоро күнүн дьоҕус уруһуйдарын быыстапкатынан арыйда. Алена Николаевна кыра сылдьан Покровскайдааҕы оҕо ойуулуур-дьүһүннүүр оскуолатыгар үөрэммит дьарыгын салгыыр,бириэмэ буллаҕына уруһуйдуурун көрдүбүт.
Алена Слепцова хас да быыстапкаҕа, араас тэрээһиннэрбитигэр өрүү кыттар олоххо көхтөөх киһибит. Аҕыйах хонуктааҕыта өрөспүүбүлүкэтээҕи «Муус устар» фестивальга кыттыбыта, ырыатынан көрөөччүлэр биһирэбиллэрин ылан Хаҥалаһын аатын дьоһуннук ааттатан кэлбитэ.
Покровскайга «Саргы түһүлгэтэ» култуура киинигэр бастакы айар кэнсиэригэр классика буолбут айымньылартан саҕалаан эстраднай нарын-намчы ырыаларын бэлэхтээтэ. Алена дьоро киэһэтин айар куттаах доҕотторо, үөрэппит учууталлара кэлэн ылбаҕай ырыаларынан киэргэттилэр,эҕэрдэ маанытын кэрэ кыыспытыгар анаатылар, айана аргыстаах буоларыгар баҕа санааларын тириэртилэр.
Ол курдук Петр Пестерев, Милена Борисова о.д.а., ону сэргэ Искусство оскуолатыттан биир идэлээхтэрэ, дьарыктыыр «Вдохновенье» оҕолорун ансаамбыллара ырыанан, үҥкүүнэн эҕэрдэлээтилэр.
Алена Слепцова истиҥ тылынан оҕо сааһа ааспыт Кытыл Дьуратын, доҕотторун ахтан аһарда, үөрэммит учууталларыгар, кинини өрүү өйүүр төрөппүттэригэр махталын тириэртэ.
Кэнсиэрин түмүктүүрүгэр күн-күбэй Хаҥаласка биллэр поэт Татьяна Петроваҕа- Мойуу Кыыһыгар, кини тылыгар уонна Люция Бандерова-Слепцова Айыллаана мелодиятыгар сөбүлээн истэр «Ийэ алгыһа» ырыабытын бэлэхтээтэ. Дьоро киэһэни култуураҕа уонна духуобунас сайдыытыгар управление салайааччыта Сергей Павлов иилээн- саҕалаан ыытта. Манна биир дьоһун түгэгинэн Алена Слепцова аар тайҕа маанылаах көтөрө уруһуйдаммыт «Улар» хартыыната аукциоҥҥа туруута буолла. Киирсиилээх түмүккэ кэрэ айымньыны 6000 солкуобайга Елена Иванова атыылаһар дьоллонно. Таарыччы эттэххэ, хартыына атыытыттан уонна көрөөччүлэр билиэттэриттэн киирбит 42 тыһ. солкуобай Покровскайтан Анал байыаннай дьайыыга сылдьар буойуттарбытыгар ананна.
Бу киэһээ тапталлаах ырыаһыппыт аатыгар үгүс кэрэ тыл этилиннэ, ол иһигэр улуус дьаһалтатын аатыттан баһылык солб. Юрий Никифоров, култуура управлениетыттан Сергей Павлов, Покровскайдааҕы бастакы нүөмэрдээх оскуолаттан дириэктэр Спиридон Шишигин о.д.а.Алена Слепцоваҕа Махтал суруктары, сибэкки туттардылар, баҕа санаа кэрэтин эттилэр. Онтон биһиги талааннаах ыччаппыт ырыатын өссө да истэ туруохпут, ситиһии кэлэ турдун диэн астына сынньанан тарҕастыбыт.
Видео: https://t.me/gazetahangalas/36674
Людмила Аммосова, ааптар хаартыскаҕа, видеоҕа түһэриилэрэ.