#спорт
Тиит Арыы нэhилиэгэ урут уруккуттан бастыҥ хайыhардьыттарынан биллэр, бу спорт көрүҥэр улууска, өрөспүүбүлүкэҕэ тарбахха баттанар дьоннордоохпут. Олортон биирдэстэрэ, чулуу киһибит Степан Дмитриевич Соловьев буолар. Степан Дмитриевич 1953 сыл ахсынньы 10 күнүгэр Орджоникидзевскай оройуон Тиит Арыы сэлиэнньэтигэр күн сирин кѳрбүтэ. 1971 сылтан «Школа-Производство-ВУЗ» диэн девиhинэн «Орджоникидзе» колхуоска олоҕун киэҥ аартыгын саҕалаабыта. Армия кэккэтигэр сулууспалаан баран Благовещенскай куорат тыа хаhаайыстыбатын институтугар инженер-механик идэтигэр ситиhиилээхтик үѳрэммитэ. Степан Дмитриевич идэ ылан араас сирдэринэн үрдүк таhаарыылаахтык, дьон махталын ылан үлэлээн кэлтэ. 2005 сылтан Тиит Арыы Аҕа баhылыгынан талыллан, тѳрѳѳбүт дойдута чэчирии сайдарыгар олоҕун бүтэhик күнүгэр диэри туох баар сатабылын, талаанын ууран туран үлэлээбитэ.
Степан Соловьев оскуола саҕаттан чэпчэки атлетика, хайыhар кѳрүҥнэригэр дьарыктанан, бэйэтин дьарыктаан үрдүк ситиhиилэри улууска, өрөспүүбүлүкэҕэ кѳрдѳрбүтэ. Ол курдук, бэйэтин кэмигэр, оскуола оҕолоругар улууска хайыhарга, сүүрүүгэ хас да тѳгүллээх чемпион этэ. Өрөспүүбүлүкэҕэ эдэр ыччаттар икки ардыларыгар хайыhар күрэҕэр чемпион үрдүк аатын сүкпүтэ. Эстафетаҕа улахан дьоҥҥо өрөспүүбүлүкэ призера буолбута. Устудьуоннуу сылдьан сүүрүүгэ Амурскай уобалас сүүмэрдэммит хамаандатын чилиэнэ. 10 км сүүрүүгэ Амурскай уобалас чемпиона буолбута. Ол сылдьан 10 км сүүрүүгэ Саха сирин рекордун олохтообута.
Үтүө киһи, бастыҥ спортсмен Степан Дмитриевич кэриэhигэр, кини аатын үйэтитэн кулун тутар 29 күнүгэр Тиит Арыыга хайыһарга аhаҕас күрэхтэһиини тэрийэн ыыттыбыт. Күрэхтэhии кыттыылаахтара кыайыыны, ситиhиини, күүстээх санааны, дьулууру көрдөрүлэр.
Степан Дмитриевич уола Александр Степанович күрэхтэһии кыттыылаахтарыгар анал бириистэри туттарда. Ол курдук, абсолютнай чемпион аатын Вячеслав Яковлев (Улахан Аан с.) ылла уонна 30 000 солкуобай бириис хаһаайына буолла. Кэскиллээх кыра кыттааччы Стручков Ньургун, аҕам саастаах кыттааччы Кононов Андрей анал бириис уонна 5 000 солкуобай бириис хаһаайыттарынан буоллулар.
2007-2010 с. кыргыттарга 1 миэстэ Алексеева Альберта (Улахан Аан), 2 миэстэ Архипова Катя (Тиит Арыы).
2011-2012 с.1 миэстэ Березкина Северина (Улахан Аан).
18-35 саастаахтарга 1 миэстэ Евстафьева Инна (Чкалов).
36-50 саастаахтарга кыайыылаах Федотова Яна (Дьокуускай к.), 2 миэстэ Ноговицына Александра (Тиит Арыы).
Бэтэрээннэргэ 1 миэстэ Варламова Ревмира (Тиит Арыы), 2 миэстэ Аммосова Дарья (Тиит Арыы) буоллулар.
Уолаттарга Строев Денис (Тиит Арыы) бастаата, 2 миэстэ Федотов Марк (Дьокуускай к.), 3 миэстэ Стручков Ньургун (Тиит Арыы).
2007-2010 с. 1 миэстэ Голоков Никита (Улахан Аан), 2 миэстэ Касьянов Виталий (Чкалов), 3 миэстэ Дьячковский Данил (Тиит Арыы) ааттаннылар.
2011-2012 сс. 1 миэстэ Старостин Айан (Чкалов), 2 миэстэ Слепцов Богдан (Улахан Аан), 3 миэстэ Кузьмин Айастаан (Тиит Арыы).
18-35 саастаахтарга 1 миэстэ Рафаилов Николай (Чкалов), 2 миэстэ Ноговицын Дьулустан (Тиит Арыы).
36-50 саастаахтарга Яковлев Вячеслав (Улахан Аан) кыайыылаах буолла, 2 миэстэ Самсонов Георгий (Нөмүгү), 3 миэстэ Соловьев Олег (Тиит Арыы).
50 саастарыттан үөһэ бэтэрээннэргэ 1 миэстэ Прохоров Петр, 2 миэстэ Кононов Андрей, 3 миэстэ Архипов Егор буоллулар.
Спорт бэтэрээнэ Афанасий Аммосов туруорбут харчынан анал бириистэрин, бэтэрээннэргэ бастаабыт Петр Прохоровка уонна кыра саастаах уолаттарга кыайбыт Денис Строевка туттарда.
Спорт бэтэрээнэ Варламова Ревмира харчынан анал бирииһин кыргыттарга үчүгэй көрдөрүүтүн иһин Алексеева Альбертаҕа анаата.
Тэрээһиҥҥэ көхтөөхтүк кыттыбыт биир дойдулаахтарбытыгар, Степан Дмитриевич уолугар Александр Степановичка, Афанасий Романовичка, Ревмира Георгиевнаҕа, Георгий Васильевичка, Егор Лукичка, Игнатий Васильевичка уонна тэрийсибит дьоммутугар барҕа махталбытын тиэрдэбит. Баҕарабыт кытаанах доруобуйаны, спордунан дьарыктаныҥ, чөл, чэгиэн-чэбдик буолуҥ!
Видео: https://t.me/gazetahangalas/36733
Софья Кузьмина, Тиит Арыы нэһилиэгин баһылыгын солбуйааччы.