Уот кураан сатыылаан турдаҕына…
Хачыкаат. Хойукку бириэмэнэн үүнүүнү буортулааччы аһыҥа маассабайдык дэлэйэн эрэр.
Аһыҥаны утары эрдэттэн охсуһуу тэриллибэтиттэн “III-Интернационал” колхоз уопсай үүнүүтүттэн 20% аһыҥа сиэбит. Бу туһунан колхоз салайааччылара быһаарыылаах дьаһалы ылына иликтэр.
Аһыҥаны өлөрөр дьаат булуллубатах уонна дьааманы хаһан онно түһэрэн өлөрүү о.д.а. дьаһаллар ылылла иликтэр. Колхоз правлениета аһыҥаны утары охсуһууга аахайымтыата суох быһыыттан аккаастаныахтаах.
Арбуһу ыһыы
Сиинэ. Лазо аатынан колхоз сир аһын үүннэриигэ бары дьоҕурдарын ууран туран кыһаллар.
Сир астарын үүннэриинэн 10 киһини анаан биир биригээдэ үлэлиир. Биригэдьииринэн хас да сыл опыттаах т. Фролов үлэлиир.
Бары сир астарыттан арбуһа ордук кэрэхсэбиллээхтик үүнэн эрэр. Арбуһу парникка үүннэрбит. Бу көрдөрөр Сахабыт сирин колхозтарыгар бахчевай култууралары ыһыахха сөптөөҕүн.
Прунков.
06.08.1942 с.
326 кг куолас хомулунна
Сата. (“СЗ» корр. Телефонунан). ”Коминтерн” колхозка 15 оҕоттон этэрээт тэриллэн 6 күн 326 кг куолас хомулунна.
Ити этэрээти Н.Петухова салайар. Кини үлэтин көхтөөхтүк тэрийдэ.
10.08.1942 с.
Иһитиннэриилэри хаһыаттан Людмила Мордовская бэлэмнээтэ.