Хоргуйууттан быһаабыта
Дуань-Сю-Фын- Михаил биһиги оройуоммутугар Аҕа дойду сэриитэ буолуон хас да сыл иннинэ кэлбит этэ. Кини маҥнай Покровскай бэкээринэтигэр хас да сыл үлэлээбит, сэрии сылларыгар дьону килиэбинэн хааччыйбыт.
Онтон I—Дьөппөҥҥө табаарыстарыгар чугаһаан көспүт уонна колхозка үлэҕэ киирбит. Элбэх киһилээх оҕуруотчуттар биригээдэлэрэ тэриллэн маастардаабыта. Онно хортуоппуй, хаппыыста, оҕурсу, помидор, эриэппэ, турнепс, моркуоп ыһыытынан дьарыктаммыттара, кэлин арбуһу эмиэ үүннэрэн боруобалаабыттара. Биһиги аҕабыт сэрии сут сылларыгар оҕуруотунан дьарыктанан элбэх киһи олоҕун быыһаан турар.
Өр сыллаах таһаарыылаах үлэ түмүгэ колхозка, оройуоҥҥа, өрөспүүбүлүкэҕэ биллибитэ. Михаил маастардаах оҕуруотчуттар биригээдэлэрэ оҥорон таһаарбыт бородууксуйаларын батарааччынан Тимошенко аатынан колхоз салалтатын аатыттан Габышев Н. А., Максимов Н. М. анаммыттара уонна оройуоҥҥа, куоракка, хоту Верхоянскайга тиийэ атыылыы сылдьыбыттара.
Дьүккүөрдээх үлэ түмүгэр Дуань-Сю-Фын Михаил Саха АССР, РСФСР Үрдүкү Советтарын Президиумнарын грамоталарынан наҕараадаламмыта, өрөспүүбүлүкэ, оройуон салалталарын көмөтүнэн 1957 с. 6х6 м. кээмэйдээхсаҥа дьиэ тутан биэрбиттэрэ.
Оҕуруот үлэтигэр дэриэбинэ дьоно дьаныардаах үлэлэрин түмүгэр I Дьөппөн Саха сиригэр бастакынан «Көрдөрүүлээх дэриэбинэ» диэн ааттаммыта. Онон сибээстээн манна үгүс делегация кэлэ сылдьыбыта: Улуу Кытайтан кэлбит бөлөх Михаил дьиэтигэр ыалдьыттаан ааспыта. Хайдах олорорун, туох дьоннооҕун көрбүттэрэ,кэпсэппиттэрэ, үлэтин билсибиттэрэ. Өссө Италияттан, Францияттан кытары кэлэ сылдьыбыттара. Сайын, ыһыахха Москваттан элбэх киһилээх делегация ыалдьыттаабыта. Олор истэригэр Серго Орджоникидзе кэргэнэ Зинаида Орджоникидзе баара.Бары делегациялар «Обрацово-показательнай дэриэбинэ» хайдах-туох олорорун, тугунан дьарыктанарын, көрдөрүүлэрин, дьонун-сэргэтин көрө-билсэ кэлэллэрэ.
Дуань-Сю-Фын Михаил өр сыл биргэ үлэлээн биллиилээх оҕуруотчуттары иитэн таһаарбыта: Федорова М. И., Захарова К. Т., Габышев Н. А., Максимов Н. М., Григорьева А. П., Скрябин уо.д.а. Кэлин Михаил уола Василий Адамов аҕатын туйаҕын хатаран Дьөппөҥҥөоҕуруотунан дьарыктаммыта.
Михаил уолунаан Василий Михайлович колхозка, совхозка, КП-га оҕуруот биригэээдэтин үлэтигэр дьоһун кылааттарын киллэрбиттэрэ.
Аҕабыт Михаил кэргэнинээн Матрена Семеновна Адамовалыын 4 оҕону атахтарыгар туруорбуттара. Кинилэр 8 сиэннээхтэр, элбэх хос-хос сиэннэрдээхтэр. Онон олох салҕанар.
Кыыһа Татьяна Адамова.