Кыайыы 80 сылын көрсө
Өрөбүлгэ Хаҥалас Кытыл Дьуратыгар фронтовик-суруйааччы Исай Никифоров төрөөбүтэ 110 сылынан Дьокуускайтан суруйааччылар бөлөхтөрө ыалдьыттаатылар. Ыраах айаҥҥа баран иһэн Улахан Ааҥҥа «Оҕо тааһа» өйдөбүнньүгү көрдүлэр, Өлүөнэ очуостара аттынан аастылар, Хаҥалас ытык сирдэрин, Петровскайга тааска суруктары, урукку дьаам ыстаансыйаларын билистилэр.
Саха норуодунай суруйааччыта, П.А. Ойуунускай аатынан государственнай бириэмийэ лауреата Сэмэн Попов-Тумат, СӨ суруйааччыларын сойууһун салайааччыта, «Чолбон» сурунаал редактора Гаврил Андросов, «Чолбон» сурунаал кыл. редаторын солб., СӨ үтүөлээх суруналыыһа Данил Матвеев, Горнай улууһуттан учуутал, Россия, саха сирин суруйааччыларын Сойууһун чилиэнэ Мария Андреева, Хаҥаластан Улуус Мунньаҕын дьокутаата, суруйааччы Исай Никифоров сиэнэ Сергей Гребнев, кыраайы үөрэтээччи, «Эллэйээдэ» оҕолор научнай экспедицияларын салайааччыта, педагог Прокопий Ноговицын, «Хаҥалас» хаһыаттан суруналыыс Людмила Аммосова бу күн «Сайдыы» култуура киинигэр олохтоохтору кытары көрүстүлэр, фронтовик-суруйааччы туһунан ахтыылары оҥордулар. Краевед Прокопий Ноговицын эдэр-чинчийээччилэр булумньуларынан быыстапкатын туруорда, Исай Никифоров туһунан документальнай киинэттэн быһа тардыыны көрдөрдө.
Суруйааччылар И.П. Никифоров пааматынньыгар сибэкки уурдулар, бибилэтиэкэҕэ фронтовикка анаммыт түмэлгэ сырыттылар. Кытыл-дьуралар ыалдьыттары сэргэх кэнсиэрдээх, биир дойдулаахтарын туһунан истиҥ ахтыылардаах, толору астаах сайдалы остуоллаах көрүстүлэр.
Людмила Мордовская.