Мин аҕам Николай Прокопьевич Никонтов 1927 с. от ыйын 1 күнүгэр I Дьөппөн нэһилиэгэр Боотулу диэн сиргэ төрөөбүтэ. Былыр эмп-томп суох буолан эт-хаан өттүнэн күүстээх киһи тыыннаах ордон хаалара. Аҕам 14 бииргэ төрөөбүттэриттэн Валерий диэн кэлин төрөөбүт быраатынаан иккиэйэҕин ордубуттар. Кини быраатынаан аҕаларын утумнаан булчут бэртэрэ этилэр. Саха дьонун сиэринэн тииҥи харахха табаллара. Аҕам сэрии сылларыгар тыа оҕолорун сиэринэн от үлэтигэр, сүөһү көрүүтүгэр улахан дьону кытта тэҥҥэ үлэлээн «1941-1945 сс. Аҕа дойду Улуу сэриитигэр килбиэннээх үлэтин иһин» мэтээлинэн бэлиэтэммитэ.
Аҕам аҕата, мин эһээм Прокопий Николаевич бэбиэскэ кэлбитигэр военкомакка тыаттан уолун кытта киирсэн оҕом сааһа 16-та эрэ диэн уолун сааһын кыччата сатаан, армияҕа ылымаҥ диэн көрдөспүтүн ылымматахтар. Онон мин аҕам Николай Прокопьевич Аҕа дойду Улуу сэриитэ бүппүтүн кэннэ, 1945 с. бэс ыйын 12 күнүгэр армияҕа ыҥырыллан Забайкальскай байыаннай уокурукка сулууспалыы тиийэр. Кини 386-с стрелковай полкаҕа түбэһэн армияҕа 6 сыл устата сулууспалаабыта. Японияны утары сэрии саҕаламмытыгар бэргэнник ытар буолан стрелок быһыытынан сылдьыбыта.
Оттон мин эһээм Прокопий Николаевич Андреев аатынан колхоз кадровай булчута этэ. Аҕа дойду Улуу сэриитэ саҕаламмытыгар кини 50-ча саастааҕа, онон фроҥҥа ыҥырыллыбатаҕа. Колхоз эдэр сэнэх дьоно сэриигэ барбыттарын кэннэ булт этинэн хааччыйан үгүс колхозтааҕы өлөр өлүүттэн быыһаабыта диэн кырдьаҕас дьон махтанан туран кэпсииллэрэ. Үһүс фронт аһыллыбытын кэннэ биһиги дойдубутугар АХШ-тан ас-үөл, табаар бөҕө кэлбитэ. Онно эһээбэр бэйэни харыстаммака бултаабытын бэлиэтээн туран кууллаах үрүҥ бурдук уонна американскай винчестер саа биэрбиттэр.
Аҕам 1951 с. дойдутугар эргиллэн кэлэн Куттал суох буолуутун министерствотын уорганыгар үлэҕэ киирбитэ. Эһиилигэр Покровскайдааҕы потреобществоҕа соҕотуопкалааччынан үлэҕэ көһөн биир сыл иһинэн соҕотуопка үлэтигэр бырабылыанньа председателин солбуйааччытыгар тиийэ үүммүтэ.
1956-1957 с.с. Н.П. Никонтов Иһит сельпотун председателинэн үлэлээбитэ. 1958-1960 сс. Центро-союз Иркутскайдааҕы кооперативнай техникумугар үөрэнэн экономист-плановик идэтин ылбыта. Ити курдук кини эргиэн эйгэтигэр сүүрбэ сыл үлэлээн пенсияҕа тахсыбыта. Ол кэннэ уонча сыл устата военизированнай охранаҕа үлэлээн элбэхтик бочуотунай грамоталарынан, махтал суруктарынан бэлиэтэммитэ.
Аҕам «1941-1945 сс. Аҕа дойду Улуу сэриитин 50 сыла», Жуков, «Японияны кыайыы иһин» мэтээллэринэн о.д.а. наҕараадаламмыта. Кэргэнинээн Нина Иннокентьевналыын 4 оҕону атахтарыгар туруорбуттара, 7 сиэни, 3 хос сиэни көрсөн эбээ, эһээ буолар дьолу билбиттэрэ.
Суруйда кыыһа Раиса Никонтова.