Эһиги бу хаартыскаҕа СӨ тыатын хаһаайыстыбатын бэтэрээнин, уруккута бэтэринээр Елена Степановна Киприянованы көрөҕүт. Кини I-Дьөппөн нэһилиэгэр үлэлиир «Иис-уус» түмсүү чилиэнэ, удьуор иистэнньэҥ. Түмсүү бибилэтиэкэҕэ үлэлиир, онно бу эҥэр бэтэрээн эбээлэр мустан иистэнэн, сэлэһэн иллэҥ бириэмэлэрин атаараллар эбит.
Елена Степановна кэргэнинээн Иван Гаврильевичтыын түөрт оҕону улаатыннаран, үлэһит гына иитэн, сиэн көрөн аҕам саастаах дьон олохторунан нус-хас олороллор. Иккиэн бэтэринээрдэр этилэр, «Октябрь 50 сыла» совхоз күннээн турар кэмигэр үгүс сүөһүгэ үлэлээбит дьон.
Елена Степановна «Иис-уус» түмсүүтүгэр сылдьар, иллэҥ бириэмэ булан кыбытык тигиинэн, алмазнай мозаика хартыыналары оҥоруунан дьарыктанар эбит. Аны кыл-сиэл оҥоһуктары айар. Кылынан-сиэлинэн ковриктары баайбытын көрөн сөхтүм. Бу дьарык олус түбүктээх үлэлээх. Кылы, сиэли сууйуу-тарааһын үгүс тулууру эрэйэр дьарык. Онтон матырыйалы бэлэмнээтэххэ — айар алыбынан үөрүүнү бэлэхтиир күүстээх. Дьаһаллаах хаһаайка кыра үлэлэртэн саҕалаан улахан коврикка санаммытыттан сөхтүм. Өҥүн-талатын олус бэркэ аттарбыта бу үчүгэйин, аккуратнайын!
Мин балтым Лидия кини бииргэ төрөөбүт балтыта Лоомтукаттан Калиса Степановна эмиэ кылынан дьарыктаммыта, араас сэлиэппэни, түбүтиэйкэни о.д.а. баайан таһаарар этин билэбин. Сураҕа ийэлэрэ иистэнньэҥ бэрдэ эбит диэн кэпсииллэрэ. Елена Степановна онтон бэриһиннэрдэҕэ дии саныыбын.
Билигин кини аа-дьуо сылдьан бииртэн биир кэрэни айар, өссө хаалыктаах хаамыынан дьүөгэлэрин кытары дьарыктанар сэргэх далбар-хотун. Дьиэтин иһэ бэйэтэ айбыт хартыыналарынан толору, ордук алмазнай мозаиканан.
Людмила Мордовская.