Аҕалартан саҕаланар
Алаһа дьиэ туттуута,
Аҕалартан саҕаланар
Айыыһыт утумун тардыыта.
Аҕалар – киэн туттуубут,
Аҕалар – дурдабыт-хаххабыт,
Аҕалар – олохпут эркинэ,
Аҕалар – олохпут эрэлэ.
Ыал аҕа баарыгар алгыстаах,
Ыал аҕа баарыгар эрдиилээх.
Аҕалар ситиммит төрдүтэ,
Аҕа баар бараммат дьол туоһута!
«Саргы Түһүлгэтэ» Култуура киинигэр «Ыал аҕата — ситим төрдө» диэн доруобуйаларынан хааччахтаах аҕалар ортотугар өрөспүүбүлүкэтээҕи күрэх буолан ааста. Күрэскэ Дьокуускайтан, Сунтаартан, Мэҥэ Хаҥаластан, Уус Алдантан, Тааттаттан, Хаҥаластан аҕалар мустан күөн көрүстүлэр. Долгутуулаах күрэҕи инбэлииттэр өрөспүүбүлүкэтээҕи уопсастыбаларын бэрэссэдээтэлэ Ирина Лебедева, Хаҥалас улууһун дьаһалтатын дьиэ кэргэн бэлиитикэтигэр кылаабынай испэсэлииһэ Елена Трофимова, Спорт Дыбарыаһын дириэктэрэ, улуустааҕы Аҕалар түмсүүлэрин бэрэссэдээтэлэ Олег Иванов, «Саргы Түһүлгэтэ» КК уус-уран салайааччыта Светлана Ударина, Хаҥалас улууһун социальнай харалтатын управлениетын отделын начаалынньыга Саргылана Явкина сыаналаатылар.
Түөрт түһүмэҕинэн ыытыллыбыт күүрээннээх, киирсиилээх күрэхтэһии түмүгүнэн “Байанайдаах аҕа” анал ааты Сунтаар улууһуттан Станислав Тараяров ылла, “Дархан аҕа” аат Тааттаттан Валерий Слепцовка иҥэрилиннэ, “Амарах аҕа” ааты Мэҥэ Хаҥаластан Дмитрий Колосов ылыан ылла. Ону сэргэ Дьокуускайтан кыттыбыт Борис Гоголев “Мындыр аҕа” ааттанна, оттон “Чулуу аҕанан” Уус Алдантан Яков Бочкарев буолла. Кылаан кыайыылаах аатын Хаҥалас улууһуттан Серафим Софронеев ылан үөрүүтэ үксээтэ. Кыайыылаахтар өрөспүүбүлүкэтээҕи инбэлииттэр уопсастыбалара туруорбут сыаналаах бириистэринэн, улуустар Махтал суруктарынан, анал сертификаттарынан наҕараадаланнылар.
Светлана Сергеева.