Бу күннэргэ «Саха» НКИХ устуудьуйатыгар «Хотугу сулус» XVIII өрөспүүбүлүкэтээҕи телевизионнай куонкурус финалга киирбит араас жанрдарын көрүү буолла. Манна Сиинэттэн «Кэнчээри» уонна «Кэскил» оҕолор фольклорнай ансаамбыллара бастакы сүүмэрдиир түһүмэҕи ааhаннар финалга киирэн ситиһиилээхтик кытынныбыт. Ол курдук, «Кэскил» бөлөх 1 истиэпэннээх лауреат буолла, оттон «Кэнчээри» ансаамбыл 3 истиэпэннээх лауреат ааттанан үөрүүбүт муҥура суох.
Бу күрэххэ өрөспүүбүлүкэ араас муннугуттан бэрт элбэх кыттааччы кэлбит. Дьүүллүүр сүбэҕэ Татьяна Гоголева, «Хотугу сулус» ааптара, дириэктэрэ, Евдокия Карманова, Дьокуускайдааҕы Оҕо искусствотын оскуолатын преподаватела, Сергей Лебедев, В.А. Босиков аатынан Музыка үрдүкү оскуолатын доцена, Ульяна Тайшина, Дьокуускайдааҕы Оҕо искусствотын оскуолатын дириэктэрин солбуйааччы, Светлана Элякова, «Хотугу сулус» Оҕо телерадиоакадемиятын редактора, Нюргуяна Куличкина, «Хотугу сулус» Оҕо телерадиоакадемиятын продюсера, Наталья Дьячковская, АГИКИ искусствоведение кафедратын старшай преподаватела, Надежда
Константинова, «Хотугу сулус» Оҕо телерадиоакадемиятын толорооччу продюсера үлэлээтилэр.
Аксинья Никодимова, «Кэнчээри» уонна «Кэскил» фольклорнай ансаамбыллар салайааччылара. Сиинэ с.