Оҕолорбут суруйаллар
Соторутааҕыта Дьокуускайга чэпчэки атлетикаҕа 2012-2013 сыллаахха төрөөбүт кыргыттар ортолоругар улахан күрэх буолан ааста. Мин биһиги оскуолабытыгар 6 кылааска үөрэнэр, сүрдээх көхтөөх, спортка дьоҕурдаах Элина Теплоуховаттан хайдах бу күрэххэ кыттан кэлбитин кэпсииригэр көрдөстүм.
«Барыта 8 улуустан талыллыбыт хамаанда кэлэн кытынна. Бастакы күн ыстаҥаҕа, тутум эргииригэр куоталаспыппыт, иккис күммүтүгэр 400 миэтэрэҕэ сүүрүү буолбута. Бу күрэхтэһиилэргэ туйгун көрдөрүүлээх Милана Скрябина 1—кы миэстэ, оттон мин 2-с миэстэни ыллыбыт. Милана 20 тыһ. солкуобай, мин 15 тыһ. солкуобай уу харчынан бириэмийэлэннибит, онон олус үөрдүбүт. Тренердэрбитигэр Очиржап Баирович Очиржаповка уонна Афанасий Ильич Скрябиҥҥэ улахан махталбытын тиэрдэбит», — диэтэ дьүөгэм Элина.
1-кы Дьөппөн орто оскуолатын үөрэнээччилэрэ «Көтөрмээчик» диэн өрөспүүбүлүкэтээҕи волейбол күрэҕэр эмиэ кытынныбыт. Манна чулууттан-чулуу хамаандалар сүүмэрдэнэн кэлэммит күүрээннээхтик күрэхтэстибит. Иккис күммүтүгэр полуфинал, онтон финал буолла. Биһиги Дьокуускай куорат 39 №-дээх хамаандатын кыайаммыт, Чурапчы спортивнай оскуолатын хамаандатыттан кыранан хааламмыт, харах уулаах хотторуу хомолтотун биллибит. Очиржапова Санаайа «Лучший игрок» номинацияҕа тиксэн санаабыт күүһүрдэ. Кэлэр сылга күүскэ бэлэмнэнэммит кыайыы диэки дьулуһуохпут!
Санаайа Очиржапова, 1-кы Дьөппөн орто оскуолатын 7 кылааһын үөрэнээччитэ. МедиаКиин.