Спорт
Покровскайга Хаҥалас улууһун нэһилиэктэрин спартакиадаларын чэрчитинэн дуобат энтузиаһа, ССРС спордун маастарыгар кандидат Владимир Романович Егоров кэриэһигэр улуус сүүс харахтаах уонна нуучча дуобатыгар хамаанданан уонна биирдиилээн бастыыр иһин чөмпүйүөнээтэ үрдүк таһымҥа ыытылынна.
Бэһис дуоскаҕа дьахталлар ортолоругар нуучча дуобатыгар чөмпүйүөн үрдүк аатын Өктөм нэһилиэгиттэн спорт бэтэрээнэ, маастарга хандьыдаат Татьяна Андреева эситистэ. Иккис миэстэҕэ 2-с Дьөппөнтөн улууспут биир бастыҥ дуобаччыта Мария Протодьяконова, үһүс бириистээх миэстэҕэ Төхтүртэн маастарга хандьыдаат, мин үөрэнэччим Марина Чемезова таҕыстылар.
Төрдүс дуоскаҕа нуучча дуобатыгар өрөспүүбүлүкэҕэ биллэр дуобаччыт спорт маастара Илья Васильев Покровскай хмаандатыттан бастаата, бириистээх миэстэлэргэ туһааннаҕынан Өктөмтөн спорт маастара Валерий Баишев уонна Нөмүгүттэн дуобат энтузиаһа Игорь Лебедев таҕыстылар.
Үһүс дуоскаҕа нуучча дуобатыгар спорт маастара Александр Якушев (Покровскай куорат) чөмпүйүөннээтэ, Улахан Аан хамаандатыттан спорт бэтэрээнэ, ССРС спордун маастара, үтүөлээх тренер Василий Кононов – иккис, үһүс бириистээх миэстэҕэ соһуччу хас да маастарга хандьыдааттары кэннигэр хаалларан Адександр Александров тахсан Булгунньахтаах дуобаччыттара түмүккэ хамаанданан бастыылларыгар улахан олук уурда.
Иккис дуоскаҕа сүүс харахтаах дуобакка дьахталларга үс кыттааччы тэбис тэҥ очукуолаах күрэхтэһиини түмүктээтилэр. Тустаах хамаандалара ханнык миэстэ буолбуттарынан чөмпүйүөнүнэн Покровскай хамаандатыттан маастар Айыына Протопопова, иккис Төхтүртэн Ксения Николаева, үһүс – Лена Романова (Нөмүгү) буоллулар.
Бастакы дуоскаҕа Булгунньахтаахтан маастар Иван Павлов инники күөҥҥэ хара маҥнайгыттан тахсан бастыан бастаата. 1-кы Дьөппөнтөн маастарга хандьыдаат Константин Васильев, Өктөмтөн улуус биир күүстээх дуобаччыта, маастарга хандьыдаат Юрий Винокуров туһааннаҕынан иккис, үһүс миэстэлэри ылары ситистилэр.
Хамаанданан түмүккэ улахан нэһилиэктэр ортолоругар үһүс миэстэҕэ Өктөм, иккискэ Покровскай тахсан спартакиада уопсай түмүгэ тахсарыгар улахан кылааттарын киллэрдилэр, бастакы миэстэҕэ Булгунньахтаах хамаандата тахсан үөрдэ-көттө.
Кыра нэһилиэктэргэ инники күөҥҥэ Төхтүр дуобаччыттара эриэ-дэхси киирсэн бастаатылар, иккискэ 1-кы Дьөппөн, үһүскэ 2-с Дьөппөн хамаандалара таҕыстылар. Миэстэлэспит хамаандалар физическэй култуура уонна спорт салалтатын грамоталарынан уонна кубоктарынан наҕараадаланнылар. Биирдиилээн дуоскаларга бастаабыт уонна 2-3 миэстэлэргэ тахсыбыт дуобаччыттар мэтээл, Грамота уонна харчынан бириэмийэ, сертификат бэлэх туттулар.
Бириистэри Владимир Романович уола, биллиилээх спортсмен Сергей Егоров, «Мегинские автомагистрали» ХЭТ салайааччыта Артуш Шагенян, “Сахатранснефтегаз” АО салайааччыта Алексей Колодезников , Селекционнай түөлбэ олохтоохторо, дьокутаат Сергей Гребнев, Владимир Романович аймахтара олохтоотулар.
Александр Соломонов, күрэхтэһии кылаабынай судьуйата.